Поранешниот египетски претседател Хосни Мубарак е погребан со највисоки воени и државни почести. Погребната поворка ја предводеше актуелниот претседател на државата, Абдел Фатах ал Сиси, кој беше придружуван од египетскиот државен врв и претставници на арапските земји. Мубарак почина вчера во болница, каде беше повеќе недели по операцијата.
Египетската јавност е поделена за државничката улога на Мубарак, кој беше на власт од 1981 година до 2011 година. Тој се смета за еден од првите политички жртви на Арапската пролет, револуционерно движење што во 2011 година го зафати целиот регион.
Откако се повлече од фунцкијата под притисок на протестите на т.н. „Арапска пролет“ во 2011 година, Мубарак беше осуден на доживотен затвор поради заговор и убиство на 239 демонстранти, а во 2015 година повторно беше обвинет дека заедно со неговите двајца синови злоупотребувал државни пари за да го зголеми личното богатство.
Мубарак беше пуштен од затвор и ослободен од сите обвиненија во 2017 година. По неговата смрт, во Египет е прогласена тридневна жалост.