Себастијан Фетел од Ферари триумфираше на првата трка во новата сезона во Формула 1 – Големата награда на Австралија.
Втор беше Луис Хамилтон од Мерцедес, а клупскиот другар на Фетел во Ферари, Кими Раиконен заврши трет. Даниел Риџкардо од Ред Бул беше четврти, а петти финишираше Фернандо Алонсо од Мекларен.
Луис Хамилтон, кој стартуваше од пол-позицијата, започна успешно и се справи со првиот напад на Кими Раиконен. До 13-тиот круг Хамилтон немаше проблеми, а зад него беа двата пилоти на „Скудерија“. Во 20-от и 21-от круг започнаа влегувањата во бокс за лидерите. Прво влегоа Раиконен и Хамилтон, а Себастијан Фетел излезе како лидер на патеката.
Германецот влезе подоцна – во 29-тиот круг. Четирикратниот светски шампион го изненади Хамилтон откако се врати на патеката пред него и го задржа водството.
Актуелниот светски шампион се обиде да го стигне пилотот на Ферари и во 50-от круг разликата беше само 1,5 секунда. Меѓутоа, на крајот, Фетел го задржа првото место и триумфираше во првата трка од новата сезона.
Во топ 10 влегоа уште Верстапен (Ред Бул), Хулкенберг (Рено), Ботас (Мерцедес), Вандорн (Мекларен) и Сајнц (Рено)