Трката за селектор на машката ракометна репрезентација почнува денеска и ќе трае во наредните пет дена. Ракометната федерација на Македонија (РФМ) го објави конкурсот со критериуми што треба да ги исполнува наследникот на Раул Гонзалез. Покрај ставот да нема клупски ангажман со цел да биде целосно фокусиран на работата со националниот тим што го најави и претседателот Живко Мукаетов на редовното годишно собрание викендот, пропишани се уште пет услови.
Како прва точка во конкурсот е наведено CV со постигнати резултати. Под два е висока стручна спрема (седми степен) или виша стручна спрема (шести степен) во областа на спортот. „Тројката“ е резервирана за поседување на лиценца за ракометен тренер од минимум трета категорија или, пак, ЕХФ лиценца за Мастер тренер согласно ЕХФ Ринк конвенцијата.
Од идните потенцијални селектори се очекува и план и програма за работа со репрезентацијата за четири години, период за кој се бара план и програма за работа и со младите селекции како и познавање на еден светски јазик. Пристигнатите апликации ќе бидат разгледувани од тричлена комисија за избор на селектор во состав Гино Стрезовски, Дарко Алексов и Ѓорѓи Тренкоски.
Македонската ракометна репрезентација е без кормилар по спогодбениот раскин на договорот меѓу Федерацијата и Раул Гонзалез. Објавата за разделба на двете страни беше лиферувана на четврти февруари, една недела по завршување на Светското првенство во Германија и во Данска на кое „црвено-жолтите“ го освоија 15. место. Од РФМ најавија дека новиот селектор ќе биде назначен најдоцна до средина на март со оглед дека националниот тим во април го очекува двомеч со Исланд во квалификациите за Европското првенство во 2020 година.