До четвртокот, кога функциониравме, имаше само еден најрегуларно пријавен кандидат, изјави Пламен Тројачанец, претседател на Универзитетската комисија за избор на ректор на УКИМ. Со владината Уредба, појаснува тој, дејствијата се ставаат во мирување и пријавите од петокот и од вчерашниот ден нема да важат, иако не е спорно дека има пријавено кандидати.
„Комисијата се состана вчера бидејќи добивме правна поука дека согласно новата Уредба сите дејствија се ставаат во мирување. Тоа автоматски подразбира и нашата работа. Процесот е целосно во мирување што подразбира и роковите и пријавување на кандидати. Јас не знам колку бидејќи сега немам потреба да ги гледам, зашто сме во мирување сè додека не биде прекината вонредната состојба“, изјави Тројачанец.
Додаде дека Комисијата не го прекинува процесот, зашто таа не го ни почнала, туку само го спроведува и сè ќе продолжи, како што рече, откако соодветните органи на државата ќе кажат дека има законски услови, т.е. ќе се прогласи завршување на вонредната состојба.
„Активносите се ставени во мирување викендот и во неделата излезе во Службен весник. Сите тие кандидати кои планираа да се кандидираат сигурно имаат правни советници кои требало да им кажат дека сè се става во мирување“, рече Тројачанец.
Запрашан зошто тогаш вчера се примале документи за кандидатури, Тројачанец одговори дека тоа е негов пропуст зашто поради природата на неговата работа како ветеринарен хирург доцна дошол во Ректоратот и ја известил службеничката.
„Но тоа е најмалку спорно. Тие кандидати требало да знаат за одлуката за ставање во мирување што беше објавена претходниот ден во Службен весник. Во никој случај ним нема да им се скрати уште тој еден ден за пријавување откако ќе се создадат законски услови и можности да продолжиме со работа“, додаде Тројачанец.