Британија ќе ги зголеми трошоците за одбрана за повеќе од милијарда фунти за да избегне реално намалување во следните две години, објави Телеграф. Се очекува министерот за финансии Џереми Хант да го објави зголемувањето на буџетот напролет, наведува весникот.
Според медиумот, воените експерти проценуваат дека буџетот на Министерството за одбрана во 2024/25 година треба да се зголеми на 50,1 милијарди фунти од 48,6 милијарди фунти за да се избегнат кратења во реални услови поради инфлацијата, која останува над 10 отсто.
За есенскиот буџет минатиот месец, Хант рече дека владата ја препознала потребата за зголемување на трошоците за одбрана и потврди дека ќе го задржи буџетот на ниво од најмалку 2 отсто од БДП во согласност со нејзината посветеност на НАТО.
„Имаме еден од најголемите буџети за одбрана во Европа и во 2020 година го објавивме најголемото зголемување на трошоците за одбрана од Студената војна“, изјави владин портпарол.
Извор: МИА