Два часа сведокот Феим Имери одговараше на прашањата на СЈО и на одбраната за фактурите од 2009, 2010 и 2012 година за начинот на кој неговата фирма „Фичо сервис“ соработувала со фирмата „Трансмет“ на Сеад Кочан, во случајот на СЈО „Труст“ за незаконскиот тендер за ископ на јаглен во РЕК Битола.
СЈО во судница на газдата на „Фичо сервис“ му предочи договори за продажба на багери, лифкери, гасеничари и го праша дали неговата фирма навистина ја продала опремата наведена во договорот и дали „Трансмет“ е купувачот.
Тој договор бил дел од тендерската документација која ја дал Кочан како доказ дека поседува механизација, чии ориганали СЈО не можело да ги пронајде во фирмата на сведокот.
Според СЈО, тоа е договор кој не се реализирал во целост („Трансмет“ купил само една од машините, а не сите) и не бил финален. На прашање на обвинителите, дали е договорот негов и дали ја продал механизација посочена во него на „Трансмет“, сопственикот на „Фичо сервис“ одговори дека договорот е негов, но не може да прецизира дали и што е реализирано од него велејќи дека требало да го повикаат заедно со сметководителите од неговата фирма.
Имери рече дека фактурите што се предочуваат се негови, како и меморандумот, но не е сигурен за личниот потпис, бидејќи, како што рече, низ годините ги менувал потписите.
Но, тој го препозна и го потврди потписот што го ставил на документот што му го дале СЈО за одземени предмети.
Сведокот потврди дека работи со фирмата Трансмет од 1991 година.
Специјалните обвинители Артан Ајро и Гаврил Бубевски во изјава за медиумите појаснија дека само една од машините кои стојат во купопродажните договори со фирмата на сведокот Имери, Кочан вистински ја набавил. Трите фактури и еден договор се од фирмата „Фичо сервис“ и опремата која ја содржат овие документи, а која се однесува на фирмата „Трансмет“ никогаш не била набавена.
Денеска требаше да се сослушаат двајца сведоци по предлог на СЈО меѓутоа едниот од нив, Васил Ристов, управител во „Силекс“, не дојде. Иако рекол дека ќе биде присутен на рочиштето, од утрово не им одговарал на телефонските повици на обвинителите на СЈО
На почетокот на рочиштето одбраната се жалеше дека не им е доставена целосната листа на докази односно таа не одговара со предложените и не можат да изнесат аргументирано одбрана. Исто така, реагираа и дека дел од сведоците што ги предложил СЈО се и нивни сведоци и им е ускратено правото директно да ги испрашуваат. Еден од нивните приговори беше и што дел од доказите како што се фактури и други документи, се на англиски, германски и турски јазик, и побараа да им се достават преведени. Адвокатите имаа и свои предлози за докази.
Судот одлучи да ги прифати сите докази на одбраната, а тие на СЈО што не се преведени наложи да се преведат и не ја исклучи можноста во текот на постапката да не дозволи изведување на одредени докази.
Следното рочиште, кога треба да се појави и сведокот што денеска не дојде, е закажано за во четврток.
Во случајот „Труст“, освен бизнисменот Сеад Кочан обвинети се уште Василие Авировиќ и Сафет Ватиќ, од фирмите „Трансмет“, „Силекс“ и „Вато“, ДООЕЛ кои се товарат дека здружени во конзорциум доставиле фалсификувани документи за сопственост на механизација и за кадровска екипираност со цел да добијат тендер на ЕЛЕМ за ископ на јаглен во Суводол, од над 17 милиони евра.