Од денеска ќе започне со работа модуларната болница до инфективната клиника и инфективното оделение во болницата 8 ми Септември, еден дополнителен тријажен центар на Институтот за ТБЦ и два тријажни центри во рамките на Здравствениот дом информира Министерот за здравство Венко Филипче
– Евидентно е дека расте бројот на нови случаи, се зголемува и бројот на пациенти на кои што им е потребан хоспитализација. Најголем притисок има во болниците во Тетово и во Гостивар, во Струга исто така се засилува. Во Тетово се хоспитализирани 90 пациенти, во Гостивар 70 пациенти, нивните интерни инфективни одделнија се со исполнет капацитет и имаат простор за уште неколку дополнително делови од одделенијата. Болницата во Лешок е полна со пациенти на кои им е потребен прием и согласно тоа утрово направивме координација во однос на тоа каде да се праќаат пациентите. Викендов имаше голем притисок како од тие градови, така и тука од Скопје во однос на Клиниката за инфективни болести и Институтот за тубекулоза, и тие капациетти се целосно исполнети, рече Филипче.
Што се однесува до процесот на вакцинација, Министерот Филипче вели дека апелот и пораката за вакцинација е за што пократко време се постигне колективен имунитет.
– Минатата недела имаше денови кога достигнавме до бројка и до 8000 граѓани кои се пријавија да примат прва доза вакцина. Некаде 50 000 вакцини се дадени минатата недела, верувам дека тој тренд ќе продолжи за да со забрзано темпо се зголемува опфатот со вакцинација, која изнесува 35 проценти на територијата на целата држава. Процентот на вакцинирано население над 70 години од 63 порасна на 70 проценти и на граѓаните над 50 години од 45 до околу 50 проценти. Гледаме дека има голем број пациенти во градовите каде опфатот со вакцинација е понизок. Градовите каде има висок процент на вакцинирани се Охрид, Битола, Штип, нема пациенти со болниците, што верувам дека и натаму ќе остане така, истакна Филипче.
Според него, досега се вакцинирани 4000 деца на возраст до 18 години во сите возрасни категории, а најмногу се вакцинираат на возраст од 16, 17 и 18 години.
За луѓе што се имунокомпромитирани, ќе се препорача и трета доза вакцина, најави Филипче.
– Утринава имаше уште една препорака од Комитетот за вакцинација, а тоа е дека ќе се препорача трета доза кај луѓе кои се имунокомпромитирани. Според препораката на ЦДЦ и здравствените институции во Соединетите Американски Држави, изјави Филипче.
Коментирајќи го вчерашниот антивакцинален протест, Филипче рече дека никој не е присилен да биде вакциниран.
– Вакцините се безбедни. За 20 пати се намалува ризикот од смртен исход. Во иднина ќе има нови соеви и вака ќе се бориме и против нив.Во однос на протестот сум разочаран, Не слушнавме реторика или порака во однос на вакцините. За жал беше полн со навреди, закани и здравствените работници кои ги ризикуваа животите за здравјето на пациентите и ги ризикуваат животите деноноќно. Веруам дека сепак пораката за безбедноста на вакцинацијата и важноста да се заштити јавното здравје како врвен приоритет да им биде јасна на граѓаните. Ќе побарам Лекарската комора да го осуди тоа што се случи на протестот, рече Филипче.
Министерот Филипче посочи дека утринава на состанокот со Комисијата за заразни болести било разговарано за нова мерка која ќе биде предложена во текот на утрешниот ден.
Новата мерка ќе се однесува на сите граѓани, македонски и странски државјани.
– Мерката ќе се однесува за влез и излез од нашата земја. Ќе биде барана потврда за вакцинација, негативен ПЦР тест или доказ за прележување на болеста, истакна Филипче.
Во Тетово не се воведуваат дополнителни мерки иако таму е критично во поглед на хоспитализациите. Има 90 граѓани во тетовската болница, во Гостивар има 70 а во Инфективната клиника во Скопје има 95.