Грчкиот премиер Алексис Ципрас вети дека ќе ја врати Грција на меѓународниот пазар за обврзници во 2017 година и покрај доцнењето на мерките со кои е условена странската кредитна помош, како и проблемите со кредиторите околу божиќната социјална програма која ја воведе.
Ципрас зборуваше на потпишувањето договор за нов фонд за коинвестиции со Европската инвестициона банка при што ја повтори волјата на грчката влада што побргу да заврши втората проценка од страна на европските кредитори за да се зачува позитивниот момент кој е креиран за државата да излезе од ситуацијата со поголем оптимизам.
„Економијата денес е на праг на закрепнување и промената на насоката е од историски размери ако се земе предвид дека економијата многупати беше на раб на бездна. Промената на насоката не е резултат на внатрешна девалвација, туку на спроведување план за активни промени и на реформи во економијата“, изјави Ципрас.
Грчкиот премиер забележа дека следната година државата со брз ритам ќе се врати на пазарите и забележа дека е уверен дека не постои европска институција која посакува државата да остане заглавена како досега поради финансиската криза.
Новиот инвестициски фонд се очекува да добие финансии во висина од 260 милиони евра од европски и од грчки фондови и да ѝ помогне на државата да заработи околу една милијарди евра и да овозможи подобри услови за водење бизнис, производство и за задржување на академиците.