Кој, всушност раководеше со полициските сили на вчерашниот протест во Скопје? Партијата или државата? Што бараше припадник на обезбедувањето на премиерот рамо до рамо со одговорните за координација на протестот?
Официјалната координација на вчерашниот протест на Шарената револуција одеше преку Сашо Митевски познат под прекарот Хитлер, но цела вечер до него беше долгогодишниот член на обезбедувањето на екс премиерот Никола Груевски и негов човек од доверба.
Камерата на НОВА ТВ го улови овој личен бодигард на Груевски, кој постојано разговараше на мобилен телефон и известуваше што се случува во секој момент. Кога нашата новинарка се обиде да се приближи до него, тој се одвои од раководниот тим на полициските сили. Другите полицајци до него, вклучувајќи го и Митевски, викаа „Бегај, оди во живо“.
Каква била неговата улога во вчерашниот протест и кој му дозволил постојано да го слуша текот на акцијата на специјалните сили, ова прашање го поставивме до МВР и лично од министерот Митко Чавков. Тие не одговорија. Овој човек од обезбедувањето го нема оној естраден имиџ, како што беше случајот со Дејан Митревски – Урко, но сепак новинарите ги знаат луѓето кои верно го следат Груевски во изминативе 10 години. По мала проверка на архивата на Јутуб, најдовме неколку видеа од ова лице како го обезбедува поранешниот премиер 
Хитлер од бомбите
Раководната палка вчера вечер навидум беше во рацете на Сашо Митевски – Хитлер, кој е помошник началник на Централните полициски служби под во кои влегуваат посебните единици – ЕБР, специјалците и одделот за обезбедување. Во вчерашната акција и во делот на обезбедување од полициските сили учествуваа униформираната полиција, Единицата за брзо распоредување и Единицата за специјални задачи. Името на Митевски се појави во „бомбите“ кои ги објави СДСМ. Во двата разговори го споменува екс министерката Јанкулоска. Во првата кога разговара со генералниот секретар на Владата Кирил Божиновски поврзана со изборни нерегуларности во Куманово.
КБ: Дајте ни листа на гласачи, дајте тркачи, заедно нашиве тимови да работат, да ги врземе знаеш, да немаат каде.
ГЈ: Да бе да, не е проблем. Јас веќе им кажав, односно само на Мирослав му кажав дека е договорено и д му се јави на овој Џорџе, тој ден, тогаш кога се видовме ја и ти со овој Милетиќ и му дадов и телефон и се. А претходно он се јавил па по друга линија, ти кажував, се јавил кај Хитлер, кај мене, пошто кумановци се они, знаеш си се знаат по разни линии. Така да они имаат веќе, да речам вака идеја, но ја кога ќе одам у Куманово следен пат, дали утре или задутре, секако овие ден-два ќе одам, или и да одам у нагоричане ќе поминам назад и ќе ги седнам заедно.
КБ: Горде, Горде, извини.
ГЈ: Е?
КБ: И тие на Хитлер да се мобилизираат исто, што се од српската напредна
ГЈ: Тие се веќе, тие се веќе мобилизирани
КБ: Со Ристе…
ГЈ: Да, они си работат на терен, ама тие се знаеш онаква структура што не мора да ги гледаат по град. Ја со Ристе си ги контролираме на…
КБ: Да, да, да.
Медиумите објавија дека началникот Митевски ја координирал и акцијата за време на протестите на 5 мај мината година, по објавување на бомбата за убиството на Мартин Нешковски, кога полицијата ги тепаше и апсеше демонстрантите. Инаку, мешањето на надлежности во МВР и познатото МВРО, го слушнавме токму од поранешната министерка Јанкулоска, која во прислушуваните разговори признава дека ова министерство е претворено во партиски штаб. Раштиманата хиерархија во МВР излезе на виделина и во случајот со смртта на Нешковски кога полициските сили без писмена наредба, по телефон се договарале каде и како да го обезбедуваат премиерот. Груевски според закон сега го обезбедуваат шест лица. Со законските измени од 2013, како поранешен премиер има право на лично обезбедување, како и право на користење на службено возило и возач. Оваа поволност му следува во период ист со периодот на времетраењето на мандатот. СДСМ минатиот месец во Собранието побара да се смени законот и на Груевски да му се укине личното обезбедување.
ВМРО ДПМНЕ: Тврдина чувана од буџетски пари
Зградата на ВМРО-ДПМНЕ е најобезбедуваниот објект во Македонија од денот кога започнаа протест. Осум недели, дење-ноќе нивното ново барокно седиште го обезбедува полицијата. За време на вчерашните протести раководени од Митевски беше затворена улицата пред седиштето, сите приоди кон истото, беа поставени водени топови, оклопни возила, а распоредени беа цели чети од ЕБР.