Откако во четвртокот беше објавено дека Фејсбук се враќа во старото издание, односно дека на news feed ќе се гледаат само објавите на пријателите, а не платените огласи, акциите на компанијата веќе следниот ден паднаа речиси за пет отсто, пишува Индепендент.
Форбс пресмета дека овој потег на Марк Цукерберг ќе го чини 3,3 милијарди долари, што е околу 4,4 проценти од неговото вкупно богатство.
Цукерберг очигледно попушти на притисоците, бидејќи во 2017 година доби милиони критики за изгледот на насловните страници на Фејсбук кои често беа затрупани со огласи на фирми.
„Едно од нашите подрачја на фокус во 2018 година ќе биде да осигураме дека времето поминато на Фејсбук е време кое ќе биде добро потрошено. Го изградивме Фејсбук за да им помогнеме на луѓето да останат поврзани и за да ги зближиме со луѓето кои им се битни. Истражувањата покажуваат дека посилните врски значат и поголема среќа. Но, во последно време добивме повратни информации од нашата заедница дека јавните содржини – објави на фирми, брендови и медиуми, ги задушуваат личните моменти кои не водат кон тоа да се поврземе едни со други“, напиша Цукерберг.
Од Фејсбук велат дека се уверени дека промената долгорочно ќе биде исплатлива и дека им е најважна среќата на корисниците кои сакаат повеќе објави од пријатели, а помалку лажни вести и платени содржини.