Образложувајќи ги предлозите за измени на Законот за плата и други надоместоци за пратениците и другите избрани и именувани лица и Законот за пратеници, координаторот на пратеничката група на СДСМ, Томислав Тунтев, на брифинг со новинарите денеска, рече дека тие оставаат простор за дебата, и ја повикаа опозицијата да се врати во Собранието за заедно да ги донесат промените за патните трошоци.

Тунтев рече дека во комуникација со координаторите на опозициската ВМРО-ДПМНЕ и претходно разговарале за надоместоците и опозицијата се сложувала со било каков предлог кој би бил логичен.

„Ние очекуваме опозицијата наскоро да се врати во Собранието. Доколку не се врати наскоро ќе се обидеме да добиеме барем согласност од нив дали да се донесат измените“, рече Тунтев.

Тој воедно дополни дека за СДСМ е прифатливо секое решение кое би било поевтино од ова што го нудат тие како предлог, во интерес на поголема заштеда на парите на граѓаните и  поголема заштеда на буџетот, бидејќи сакале да бидат пример.

На новинарско прашање на НОВА, доколку намерата е да се биде пример, зошто како пратеничка група не се откажале од надоместокот за патните трошоци за изминатите четири месеци, додека да се донесат измените кои ги предлагаат, Тунтев вели затоа што имаат реални трошоци.

„Релативно е тврдењето дека нашите плати споредени со другите функционери се прилично високи. Јас ви зборувам за месеци кога сме имале над 20 работни денови. Имало месеци кога сме имале и три работни денови. Имало и наши доаѓања кои не сме ги евидентирале. Јас како координатор на пратеничката група имам протоколарни активности. Имаме посети од меѓународни претставници. Ние тогаш не земаме трошоци, а доаѓаме за тоа. Не сме наплатиле ние се што ни следува, бидејќи сме свесни дека одредени активности кои не се поврзани со наша редовна работа во Собранието, дека е наша должност“, одговори Тунтев.

Реакциите во јавноста за патните трошоци се интензивираа откако истражувачката мрежа СКУП, неодамна објави кои пратеници земале најмногу патни трошоци за последните четири месеци, кои законски им следуваат.

Според истражувањето, најскапо платен пратеник последните четири месеци е Алија Камберосвски од СДСМ на кој му се исплатени 4.260 евра за овој период, како и Лилјана Затуровска од ВМРО-ДПМНЕ.

Координаторот на пратеничката група на СДСМ, Томислав Тунтев, кој доаѓа од Охрид, за овој период наплатил 3.843 евра.