Охрид викендот е „дупка полн“ што би рекол народот, но, истовремено, е како депонија според фотографиите што се објавуваат на социјалните мрежи. Гостите во македонскиот туристички бисер, претежно домашни, зад себе оставаат купишта ѓубре и не само што отвораат еден куп работа за локалната комунална служба туку на дело ја истакнуваат и сопствената (не)култура и (не)грижа кон животната средина.

Мерките и препораките за заштита од Ковид-19 не се почитуваат во целост, особено во вечерните часови во централното градско подрачје, на кејот и околу пристаништето. Како се седело синоќа крај Охридското Езеро, така се оставиле пластични ќеси, пластични чашки, кутии од цигари, пластични шишиња од пијалоци (пиво, сокови), хартија, лименки, хартија, итн.

Коментарот на локалните жители е краток и јасен – ваква глетка зад себе не оставаат странските туристи.