Дел од граѓаните велат дека доаѓаат на вакцина поради заштита на здравјето, а дел потврдуваат дека токму сега примаат вакцина поради новите мерки – вели Миркоска 
Значително е зголемен интересот на граѓаните за вакцинација овие два-три дена, по одлуката на Владата за новите мерки против ширењето на ковид-19 кои почнуваат да се применуваат од понеделник – една од нив е лице кое не примило вакцина нема да има право да влезе во угостителски објект или да присуствува на настан на кој има повеќе од 30 учесници.
Од скопската поликлиника Букурешт изјавуваат дека двојно повеќе граѓани доаѓаат да се вакцинираат во последниве денови, а тврдат дека не враќаат никого – ниту за прва доза, ниту за ревакцина. Слично е и во другите скопски пунктови за вакцинација.
– По најавата на новите мерки кои стапуваат на сила од понеделник обемот на имунизација е зголемен во овие два три дена и тоа за најмалку двапати! Особено заинтересираноста за вакцинација е зголемена кај млади лица, но и кај  возрасните. Еве на дневно ниво вчера дадовме 1400 вакцини и тоа прва доза, како и ревакцина, а порано аплициравме од 500 до 600 дози – изјави за  НОВАТВ главната сестра во поликлиниката, Силвана Миркоска.
Таа додава дека на пунктот во поликлиниката Букурешт успеваат да одговорат на зголемениот обем на работа, а за тоа која причина ја наведуваат граѓаните коишто доаѓаат да се заштитат од ковид-19 и дали поитаа сега да се имунизраат за да можат непречено да влезат во ресторан, на спортски настан, изложба или концерт, Миркоска вели:
– Имаме доволно екипи на располагање за никој да не вратиме. Дел од граѓаните велат дека доаѓаат на вакцина поради заштита на здравјето, а дел  потврдуваат дека токму сега ја примаат вакцината поради најавените нови мерки во рестораните и на други места. Инаку, имаме од вакцините на Астра Зенека, Синовак и Фајзер Бионтек, а гужвите деновиве не се само поради новите мерки, туку и тоа што голем дел од граѓаните не го испочитуваа закажаниот термин за ревакцинација од крајот на јули. Велат дека тогаш биле или на годишен одмор надвор од земјата или од други причини не успеале да дојдат, па еве сега доаѓаат за втора доза. А бидејќи не сакаме никого да вратиме, вакцинираме и закажани и незакажани, и оние со термин и оние кои ни доаѓаат без термин – нагласува Миркоска. 
Вчера во Скопје беа отворени уште  4 пункта за вакцинација против ковид-19.
Кои ќе бидат казните за гостите ќе се знае деновиве 
За тоа какви ќе бидат казните за граѓаните кои ќе бидат затекнати без сертификати во објектите, а какви за сопствениците на ресторани и други објекти и кои се инспекции ќе ги проверуваат гостите, надлежните најавуваат  дека во текот на следните денови ќе се реши како ќе се спроведува одлуката и кој точно ќе легитимира.
– Угостителските објекти може да бидат казнети заради непочитување на мерките во делот на бројот на гости и одржување на собири на истиот начин како и досега. Казни за гости кои немаат сертификат, а се затекнати на местото како и дали ќе има казни и за угостителите ќе се одлучува во следните денови. Во овој период ќе зајакнат контролите на инспекциските служби и апелираме граѓаните да ги следат овие препораки и мерки – одговараат од Министерството за здравство.
„Затворено за невакцинирани“ 
Владата на последната седница донесе одлука лице коешто не е вакцинирано против ковид-19 да нема право да влезе во угостителски објект или да  присуствува на настан на кој има повеќе од 30.

– Од 16 август се воведува задолжителна потврда за извршена имунизација, најмалку прва доза, со задолжителна редарска служба заради контрола на приложување доказ за вакцинација при влез во секаков вид на објект, вклучително и во угостителски објекти, каде има повеќе од 30 присутни лица, за било каков настан (прослава, концерт, семинар, обука, работилница, конференција, културни или спортски настани), информираа од Владата.

Љубица Балабан