Претседателот на Европскиот совет Доналд Туск, во врска со повикот на британската премиерка Тереза Меј за одржување предвремени парламентарни избори на 8 јуни, на Твитер напиша дека „Хичкок го режираше Брегзит“.
-Прво земјотрес, а потоа напнатоста расте, напиша Туск, алудирајќи на коментарот на славниот режисер Алфред Хичкок дека добриот филм треба да започне со земјотрес и потоа напнатоста да расте.
Во твитот кој по неколку минути го напиша и на официјалниот профил како претседател на Европскиот совет, Туск истакнува дека „имал добар телефонски разговор со премиерката Тереза Меј за претстојните избори во Обединетото кралство“.
ЕУ соопшти дека не очекува распишувањето избори во Велика Британија да влијае на преговарачките насоки за напуштањето на Унијата.
-Изборите во Британија не ги менуваат нашите планови ЕУ- 27. Очекуваме дека Европскиот совет ќе ги усвои насоките за Брегзит на 29 април и потоа преговарачките директиви да бидат подготвени за 22 мај, изјави портпаролот на Туск Пребен Аман за агенцијата АП.