Администрацијата на Доналд Трамп ги објави класифицираните документи за убиството на претседателот на Америка, Џон Ф. Кенеди во 1963 година.

Папката содржи 2.800 документи за кои Трамп рече дека треба да бидат објавени бидејќи јавноста заслужува целосно да биде информирана по неколку децении теории на заговор.

Но не се сите податоци објавени, пишуваат американските медиуми, бидејќи владини агенции не сакале некои од записниците да излезат во јавноста.

Извори од Белата куќа јавуваат дека Трамп сакал сите документи да бидат објавени, но кога на своето биро во четвртокот ги добил папките, одредени национални агенции побарале одредени записници да останат тајни бидејќи немало време да се проверат сите.

Како што навршувал крајниот рок, Трамп се соочил со дилемата дали да ги објави сите 3.100 документи интегрално или 2.800 кои биле проверени, по што иако не бил среќен, се одлучил за второто.

Чувствителните документи, според извори од Белата куќа, содржеле информации за идентитетот на информантите.

Инаку, во еден од објавените документи се вели дека ФБИ ја предупредил полицијата дека имало закани за убиство упатени кон убиецот на Кенеди, Ли Харви Освалд, кој пак, беше застрелан во полициски подрум во Далас, два дена по убиството на Кенеди.

„Ја известивме полицијата и тој гарантираше дека Освалд ќе добие соодветна заштита“, се вели во еден од документите потпишан од тогашниот директор на ФБИ, Едгар Хувер.

Додека се уште се анализираат сите документи, објавено е и дека има записник на ЦИА во кој е наведено дека Освалд имал средби со претставник на руското КГБ во амбасадата на Русија во Мексико Сити.

Неколку часа пред убиството на Кенеди, британски регионален весник, „Кембриџ Њуз“ добил повик во кој било наведено дека нешто големо ќе се случува во САД.

Претседателот Кенеди беше убиен на 22.номеври 1963 година додека парадираше со кабриолет лимузина низ Далас.

За убиството е обвинет поранешниот маринец Ли Харви Освалд, кој според судот, пукал во Кенеди од библиотека близу местото на убиството.

Во 1992 година, Конгресот донесе закон во кој сите записници поврзани со убиството, околу 5 милиони страни, да бидат затворени за јавноста во наредните 25 години.

Иако по убиството излегоа илјадници книги, емисии и филмови кои го разгледуваат атентатот, никој досега не даде убедлив доказ дека Освалд, работел со некој друг за да го елиминира претседателот на Америка.