Реал Мадрид ја брани титулата и ќе атакува на трета во низа, Лионел Меси е на три гола до 100. во натпреварувањата на УЕФА, Икер Касилјас ќе игра 19 сезона, Лајпциг и Карабаг се дебитанти, Феенорд се враќа по пауза од 15 години, кам-бек на големата сцена и на Манчестер јунајтед. Ова се факти за најава на новата сезона на фудбалското шоу на стариот континент. Со вечерашните мечеви од А – Д сегментот почнува Лигата на шампиони.
„Секогаш е исто. Ние, Барселона, Јувентус, Баерн и ПСЖ. Четири од овие пет тима ќе играат во полуфинале“, коментира Кристијано Роналдо пред почетокот на возбудувањата.
Англиските клубови се како отпишани. Малкумина верваат дека некој премиерлигашки претставник би можел да ја освои тероторијата на која е главен Реал Мадрид во последните неколку сезони. И кај нив самите има отсуство на самодоверба. Надежи, сепак, се полагаат во Челзи и двата гиганта од Манчестер иако и Антонио Конте и Жозе Мурињо сметаат дека лондонските „сини“ и „црвените ѓаволи“ сè уште созреваат. Шампионската лига непочната, а Португалецот веќе почна со пецкање на сметка на Баерн и на Јувентус.
„Би сакал да ги видам во Премиерлигата. Тие цела пролет ја играат со резервен состав во своите првенства“, тврди „специјалниот“ кој додава дека секој има 10 отсто шанси пред стартот, некој повеќе некој помалку, но дека е тешко да се предвиди победникот.
Фокусот е на „Камп Ноу“ каде Барселона го дочекува Јувентус во дербито на вечерта. Во групата Д уште и пресметката на „Јоргос Караискакис“ стадионот во Атина каде Олимпијакос го пречекува Спортинг Лисабон со Стефан Ристовски, единствениот македонски претставник во ЛШ во оваа сезона.
Манчестер јунајтед на „Олд Трафорд“ ќе посака добредојде на Базел во рамки на групата А во која и Бенфика на својот „Луж“ ќе влезе во битка за први бодови против московска ЦСКА.
Андерлехт и Селтик на хартија важат за „топовско месо“ во групата Б во која ќе играат и Баерн и ПСЖ. Баварците во Минхен се апсолутни фаворити во дуелот со белгискиот состав, истото важи и за париските „светци“ со Нејмар и Мбапе кои ќе гостуваат на „Селтик парк“ во Глазгов.
Рома на „Олимпико“ ја очекува тешка задача со Атлетико Мадрид во Ц конкуренција што носи натпревар и на „Стемфорд бриџ“ меѓу Челзи и Карабаг. Уживајте.
Лига на шампиони – вечерва играат
Група А
Манчестер јунајтед – Базел (20,45 ч.)
Бенфика – ЦСКА Москва (20,45 ч.)
Група Б
Баерн Минхен – Андерлехт (20,45 ч.)
Селтик – ПСЖ (20,45 ч.)
Група Ц
Рома – Атлетико Мадрид (20,45 ч.)
Челзи – Карабаг (20,45 ч.)
Група Д
Барселона – Јувентус (20,45 ч.)
Олимпијакос – Спортинг Лисабон (20,45 ч.)