Аргентинецот даде три од четирите гола на Каталонците против Сити, најубедлив Арсенал против Лудогорец, убедливи и Баерн М. и ПСЖ. Изненадување приреди Бешикташ со триумфот против Наполи
Барселона го „понижи“ Манчестер сити со 4:0 на враќањето на Пеп Гвардиола на „Камп Ноу“, а Лео Меси стана фудбалерот со најмногу хет-трикови во историјата на Лигата на шампиони. Аргентинецот погоди во 17, 61 и 69 минута, Нејмар промаши пенал во 87 минута, но две минути подоцна успеа да постигне и четврти погодок за Каталонците за печат на убедливата победа и лидерска позиција во групата Ц.
Во вториот меч во групата Ц, Борусија Менхенгладба славеше на гостувањето кај Селтик со 2:0.
Најубедливата победа во мечевите од третото коло ја оствари Арсенал. Премиерлигашот на „Емирати“ го „разнесе“ Лудогорец со 6:0 со хет-трик на Месут Езил (56, 83, 87 минута) и по еден гол на Санчез (12 минута), Волкот (42 минута) и на Чембрлен (46 минута).
Триумф без примен гол забележа и ПСЖ на домашен терен против Базел (3:0). Ди Марија (40 минута), Лукас (62 минута) и Кавани од пенал (90+2 минута) беа стрелци за „светците“.
Баерн Минхен си поигра со ПСВ Ајндховен на „Алианц арена“ за конечни 4:1. Милер (13 минута), Кимих (21 минута), Левандовски (59 минута) и Робен (84 минута) ги постигнаа головите за Баварците, Нарсиг во 41 минута го постигна единствениот за тимот од Холандија.
Атлетико Мадрид со минимални 1:0 славеше на гостувањето во Русија кај Ростов. Караско во 62 минута го матира домашниот голман што на крајот се покажа доволно за трите бода.
Изненадувањето на вечерта го приреди Бешикташ. Турскиот состав го совлада Наполи во Неапол со 3:2 и се проби на второто место во групата Б. Двоен стрелец за победничката екиа беше Абубакар (38, 86 минута), третиот, прв на средбата, го запиша Кореа (12 минута). Мертенс во 30 минута и Габијадини во 69 минута беа стрелци за калчолигашот.
Гостинска радост имаше и на вториот меч во групата Б. Бенфика го победи Динамо Киев со 2:0 со головите на Салвио во 9 минута од пенал и Черви во 55.
Лига на шампиони
Група А: Арсенал – Лудогорец 6:0, ПСЖ – Базел 3:0.
Табела: Арсенал 7, ПСЖ 7, Базел 1, Лудогорец 1.
Група Б: Наполи – Бешикташ 2:3, Динамо Киев – Бенфика 0:2.
Табела: Наполи 6, Бешикташ 5, Бенфика 4, Динамо Киев 1.
Група Ц: Барселона – Манчестер Сити 4:0, Селтик – Борусија Менхенгладбах 0:2.
Табела: Барселона 9, Манчестер Сити 4, Борусија Менхенгладбах 3, Селтик 1.
Група Д: Баерн Минхен – ПСВ Ајндховен 4:1, Ростов – Атлетико Мадрид 0:1.
Табела: Атлетико Мадрид 9, Баерн Минхен 6, ПСВ Ајндховен 1, Ростов 1.