Тимот на Скендербег пред еден месец ја доби највисоката казна во фудбалската историја игра за лажирање на резултати. Сега, пак, „Гардијан“ објави тајни документи со шокантна содржина за матните игри на шесткратниот првак на Албанија. Во материјалот на етичкиот и дисциплински комитет при Европската фудбалска асоцијација (УЕФА) до кој дојде британскиот весник се наведуваат 53 сомнителни натпревари на популарните „снежни волци“ од Корча во периодот од ноември во 2010 година до април во 2016 година. Акцентот на инспекторите притоа бил ставен на четири средби во сезоната 2015/16 од кои две во квалификациите за Лигата на шампиони (ЛШ) и две во групната фаза во Лига Европа (ЛЕ).
Двата меча за пласман во шампионската Лига на УЕФА се реванши против Крусејдерс и против Динамо Загреб на „Максимир“. По триумфот над северноирскиот состав со 4:1 во првиот дуел, Скендербег имаше и 2:1 на гостувањето на Островот, но прими два гола во втората и во третата минута од судиското екстра време за конечни 3:2 за Крусејдерс. Пред да бидат постигнати, системот на УЕФА забележал „невидени примери на сомнително обложување во живо и минимум неколку стотици илјади долари“. Финишот на мечот беше сомнителен и за голманот на екипата од Белфаст.
„Ако УЕФА не го истражи ова, нешто не е во ред“, напиша Шон О’Нил на Твитер што беше земен и како доказен материјал во постапката.
Вториот спорен натпревар на Скендербег за ЛШ е против Динамо во Загреб. „Модрите“ го добија првиот меч во Албанија со 2:1, но возвратниот дуел на „Максимир“ падна во очи на УЕФА. Случувањата во завршницата, според извештајот, донесоа 15 милиони евра на обложувачите и обложувалниците. Хрватскиот состав имаше 3:1 и фудбалер помалку (беше исклучен Гонзало) по што почнал тренд на уплати на големи суми на пари на азискиот пазар дека албанскиот претставник до крај ќе прими и четврти гол што и се случи.
„Играчите на Скендербег доброволно престанаа да играат со цел да го искористат натпреварот во насока на обложување штом се укаже прилика. Очигледно беше оти тимот на Скендербег е единствен учесник во манипулациите со средбата“, е заклучок во материјалот на инспекторите кои како главни актери ги посочуваат голманот Оргеш Шеги и дефанзивецот Тефик Османи.
Двете спорни средби во фазата по групи во ЛЕ се против Спортинг во Лисабон и против Локомотив во Москва.
Обвинувањето за Скендербег е насловено како „обид со манипулација да обезбеди криминален профит од обложување“. УЕФА, се чини, е решена во намерата да застане во заштита на интегритетот на фудбалската игра иако нејзините инспектори се соочија со смртни закани по „протекување“ на извештајот во јавност.