Туристичко-угостителската Kомора на Македонија денеска објави дека илјадници угостителски објекти кои тие ги застапуваат нема да ги користат мерките на Владата бидејќи, како што посочија оттаму, се недоволни и селективни и ќе придонесат за нивно дополнително задолжување.
„Свесни сме дека подобри мерки нема да добиеме. Затоа сакаме да и соопштиме на Владата дека угостителскиот сектор, односно субјектите кои ги застапуваме нема да ги користат најавените мерки и дека средствата може да ги насочат директно кон сите кои остануваат без работа или во сектори каде мислат дека ќе постигнат ефект. На овој начин институциите може директно да им помогнат без притоа дополнително да нè задолжуваат со кредити за придонеси и наталожени трошоци“, изјави Мартин Ангеловски од Туристичко-угостителската комора на Македонија.
Тој посочи дека сите би сакале да ги задржат своите вработени, но оти нема да можат бидејќи немаат приходи, со оглед на тоа што тие беа први затворени, а веројатно и последни ќе бидат отворени, иако не се знае кога би било тоа. Се работи, рече тој, за мали фирми кои немаат резерви и не можат да го понесат товарот од оваа криза.
Ангеловски информира дека веќе е почнат процесот на одјавување и според нивните информации повеќе од 60 проценти од вработените низ цела Македонија се одјавени. Како што рече, според неофицијални информации, станува збор за околу 15.000 лица.
„Значи мерките не важат за никој кој претходно има земено каква било субвенција, сега не може фирмата воопшто да користи. Ако за еден вработен човек земале мерка која што, на пример, излезе минатата година за зголемување на плата, таа субвенција на придонеси од страна на државата или ако имате мерка за вработување на лице над 50 години за субвенција на придонесот од државата, сега таа фирма не може да аплицира за новите мерки. Дополнително за тие 14.500 денари сега секоја фирма треба да се задолжи до износот на придонесите, односно до бруто платата. Тие средства ние треба да ги обезбедиме во момент кога не функционираме и не се само тие трошоци во угостителството, сите имаме кирии, сите имаме режиски трошоци, други давачки, значи не е мала сумата што ние треба да ја поднесеме како што ни се апелира“, објасни Ангеловски.
„Со моменталниот закон не можат да го користат тој надомест. Владата со мерката број 4 најави дека сите што ќе останат без работа ќе се погрижи да добијат придонес и се повика на членот од законот каде што искажува колкав е тој придонес, а тоа е 50 проценти од нето платата во изминатите 24 месеци. Така би требало, според наше разбирање, зошто така кажа и премиерот, да биде мерка број 4 од уредбите сега што ќе излезат“, посочи Ангеловски.
Тој информира дека во овие дејности биле вработени околу 29.000 лица, во околу 6.000 правни субјекти.