Управата за хидрометеоролошки работи (УХМР) предупредува на можни локални излевања кај помалите водотоци на целата територија на државата, поради нестабилното време и очекуваните поројни врнежи дожд.
„На одредени места, поради стеснување на водотеците од разни причини, можни се локални излевања. Препорачуваме внимателно движење покрај водотеците и суводолиците“, велат од УХМР.
Како што информираа од Управата синоќешните врнежи, не го промениле многу водостојот, но кај одредени помали водотеци предизвикале брзи покачувања на нивото на водата. Според најавите на синоптичарите, денеска попладне се очекува пороен дожд и грмежи. Локално, процесите ќе бидат поинтензивни во форма на невреме со обилен пороен дожд, електрични празнења, засилен ветер и град. На одредени места се очекува да наврнат над 35 литри дожд на метар квадратен.