Украина воспостави две рути за извоз на жито, преку Полска и Романија, со цел да ја спречи светската криза со храна, изјави помошникот на шефот на украинската дипломатија Дмитро Сеник, пренесе агенцијата Ројтерс на својата веб-страница.
На безбедносниот форум „Дијалог Шангри Ла“ во Сингапур, Сеник рече дека глобалната безбедност на храната е загрозена бидејќи руската инвазија го запре украинскиот извоз на жито од Црното Море, што предизвика општ недостиг и скок на цените.
Пред руската инвазија, Украина беше најголемиот светски производител на сончогледово масло и еден од главните извозници на пченица, додека оваа година милиони тони жито останаа во украинските пристаништа поради руската блокада.
„Украина беше во преговори со балтичките земји за додавање трет коридор за извоз на храна. Овие рути не се совршени бидејќи создаваат одредени тесни грла, но ние даваме сѐ од себе за да ги развиеме тие рути“, изјавил Сеник за Ројтерс.
Тој не дал повеќе детали колку жито е веќе преместено или ќе биде пренесено по овие рути.