Во порака споделена на социјалните мрежи, амбасадорката на Украина во Северна Македонија, Лариса Дир, изрази благодарност и поддршка за иницијативата #ТоплинаЗаУкраина, нагласувајќи ја важноста на солидарноста во еден од најтешките периоди од војната.
„Благодарение на донациите на претставниците на Собранието на РСМ, дипломатскиот кор и граѓаните, Амбасадата на Украина, во рамки на кампањата #WarmthForUkraine со Caritas и @CivilMacedonia, обезбеди генератор за Буча и топли ќебиња за жителите на прифронтовската Сумска област. Ја цениме помошта!“ – напиша амбасадорката Дир.
Иницијативата #ТоплинаЗаУкраина има за цел да обезбеди итна помош, вклучувајќи генератори за струја, опрема за греење и зимска опрема за заедниците погодени од руската агресија врз Украина. Поради континуираните напади врз цивилната инфраструктура, милиони луѓе и понатаму се соочуваат со недостиг од електрична енергија и екстремно ниски температури.
Минатиот месец, ЦИВИЛ – Центар за слобода, во координација со Амбасадата на Украина, по јавниот апел на министерот за надворешни работи на Украина, Андриј Сибига ги повика сите хумани луѓе да се приклучат на хуманитарната акција #ТоплинаЗаУкраина за прибирање средства и агрегати за снабдување со електрична енергија за домаќинствата, училиштата и болниците во земјата.
Организаторите на акцијата потенцираат дека потребите се и понатаму големи и итни. Затоа, на самиот почеток на акцијата #ТоплинаЗаУкраина, се приклучи хуманитарната организација Каритас и отвори сметка за донации каде што може да се донираат средства.
„Ова не е само хуманитарен гест – ова е став на достоинство, човечност и отпор кон уништувањето“, порачуваат од ЦИВИЛ, упатувајќи повик „до сите хумани луѓе да се вклучат во оваа благородна акција за спас на човечки животи.“
Додека Украина продолжува да ја брани својата слобода и демократска иднина, иницијативи како #ТоплинаЗаУкраина претставуваат важен мост на солидарност меѓу граѓанките и граѓаните на Европа кои директно ги трпат последиците од војната, велат од ЦИВИЛ.
„Во време кога студот се користи како оружје против цивилите, секој чин на топлина е чин на отпор“, објави ЦИВИЛ на социјалните мрежи.
Од организацијата нагласуваат дека континуираната соработка со Амбасадата на Украина, како и личната посветеност на амбасадорката Лариса Дир, имаат клучна улога во координацијата и видливоста на акцијата #ТоплинаЗаУкраина. Нивната поддршка, велат организаторите, е силен поттик за солидарноста што се шири и дополнителна гаранција дека помошта ќе стигне таму каде што е најпотребна – до луѓето кои се соочуваат со суровите последици од воената агресија и претворањето на студот во смртоносно оружје.
Извор: ЦицилМедиа