Украинската јавна обвинителка Ирина Венедиктова изјави дека се идентификувани голем број руски војници, кои според обвинителството се вмешани во кршење на човековите права во градот Буча.
Во објава на Фејсбук, Венедиктова рече дека 10 војници биле идентификувани како „вклучени во тортура врз мирни цивили“ за време на нивната окупација на градот. Војниците биле со различни чинови, рече таа, именувајќи четворица војници, четворица капелари и двајца наредници. Тие беа од 64-та Посебна моторизирана стрелачка бригада, додаде таа.
На почетокот на овој месец, на 64-та бригада и беше доделена почесна титула од рускиот претседател Владимир Путин, кој го пофали нивниот „голем хероизам и храброст“ и ѝ ја додели на единицата титулата „гарда“ за „заштита на суверенитетот на Русија“. „Ова високо признание ги препознава вашите посебни заслуги, големото херојство и храброста во одбраната на вашата татковина и во заштитата на суверенитетот и националните интереси на Русија“, рече тогаш Путин честитајќи им за херојство.
За „многу кратко време, истрагата утврди дека за време на окупацијата на Буча, тие земале невооружени цивили како заложници, не им обезбедувале храна и вода, ги држеле на колена со врзани раце и со очи покриени со селотејп лента, при што биле исмејувани и тепани. Ги тепаа за да добијат информации за локацијата на украинските вооружени сили и резервни одбранбени сили, а некои беа мачени и без никаква причина“, рече Венедиктова.
Таа додаде дека „руските војници се закануваа дека ќе ги убијат жртвите, па дури и имитираа егзекуција пукајќи во нивна насока“, додаде таа. „Улогата и учеството на секој од нив во овие злосторства е утврдена преку истражна и координирана работа на обвинителите и полициските службеници“, посочи обвинителката.