Ги нарече лавици и повика на масовно женско обединување во Македонија. Претседателката на Унијата на жени на ВМРО ДПМНЕ, Благица Ласовска од говорницата на 18. годишна Конференција изрази дека е горда на храбрите членки кои се преку 50.000 на број, но и на мрежата од 75 општински комитети што години наназад креирале политики, лансирале нови платформи, промовирале нови стратегии за родова еднаквост и за застапеноста на жените во политиката.
„Живееме во општество што е поделено и во кое едни мислат дека се високо качени и гледаат како се уништуваат други, а притоа се заборава дека тој другиот е нечиј пријател или негов подалечен роднина. Затоа ве повикувам на едно масовно женско обединување во Република Македонија. Во секоја од нас има една Параскева од драмите на Горан Стефановски, една Велика од Петре М. Андреевски, една Арбулика од Чинго или Магде од Чашуле. Мислите дека не може да кренеме женско востание или да направиме женска револуција? – Но, не. Наша револуција е љубовта, разбирањето и стремежот за подобро утре за нашите деца“, рече Ласовска.
Мицкоски: Мора да одберете страна, да одлучите, да излезете и да гласате
Пред членството на Унијата на жени на ВМРО ДПМНЕ свое обраќање имаше и лидерот на партијата, Христијан Мицкоски. Најмногу место во неговиот говор зафати актуелната политичка состојба во државата, владеењет на СДСМ, за „заевизмот“, а на претстојните претседателски избори гледа еден вид на референдум за изразување на волјата на народот.
„Време е да се слушне вашиот глас во политиката. Сега е момент во кој мора да се определи секој од вас. Не е доволно да стоите пред малите екрани и да бидете само огорчени поради лошата реалност. Мора да одберете страна, да одлучите, да излезете и да гласате. Или ќе гласате против сето ова што се случува или ќе одбиете да влијаете на работите што стануваат се полоши. А тоа зависи од вас. Или сте со нас и заедно ќе се бориме или ќе одобрите неправдата да стане закон. Да не ги повторуваме грешките од минатото во кое предупредувавме како партија дека со оваа власт ја губиме Македонија“, рече Мицкоски меѓудругото.
На 18. годишна Конференција на Унијата на жени на ВМРО ДПМНЕ беше и претседателскиот кандидат на партијата, Гордана Силјановска-Давкова.