На децата бегалци и мигранти им се закануваат респираторни и други сериозни болести дури и смрт од хипотермија од екстремниот студ и невреме што беснеат низ Централна, Источна и Јужна Европа, соопштија денеска од УНИЦЕФ.

Во Грција и на Балканот, заглавени се околу 23.700 деца бегалци и мигранти  вклучувајќи и бебиња и новороденчиња, главно од Сирија, Ирак и Авганистан. Многу од нив се сместени во засолништа што се лошо опремени за зима, дури и кога температурите паѓаат под нулата.

Некои делови од Грција, особено островите, каде што илјадници бегалци се засолнети во излитени шатори, за првпат по многу години има обилни снежни врнежи. УНИЦЕФ ги повикува бегалците и мигрантите кои во моментов живеат во преполни и неоспособени кампови на островите да се преселат во посоодветно и побезбедно сместување на копното.

 „Без соодветно засолниште и топла облека, децата се во голема опасност од лошите временски услови. Бебињата и многу малите деца обично имаат помалку телесно масно ткиво за да ги изолира од студот, што ги прави поподложни на проблеми со дишењето и на потенцијално фатални вирусни и бактериски инфекции, како што се пневмонија и грип,“изјави Базил Родрикес, регионален здравствен советник на УНИЦЕФ за Централна и Источна Европа.

 Претрупаноста и лошата изолација ги прават засолништата особено нездрави и при налет на бранови од студ, овозможуваат брзо ширење на респираторните болести. Според СЗО, сезоната на грип во Европа е во тек.

 „Освен од студеното време, здравствените ризици со кои се соочуваат децата се последица од нивната тешка ситуација како бегалци и мигранти, жртви на неизвесност и застој во обработувањето на нивните барања за азил. Оваа состојба „ни на небо, ни на земја“ влијае врз здравјето на децата, уште повеќе зголемувајќи ја нивната мака“, рече Родрикес.

 УНИЦЕФ прави напори да им се помогне на жените и децата да бидат на топло во Хрватска, Србија, Словенија и поранешната југословенска Република Македонија.

 Во Бугарија, во прифатните центри од УНИЦЕФ обезбедиле комплетна зимска облека за 500 деца. Од крајот на 2015-2016 година, центрите за поддршка на децата и семејствата, просторите наменети за мајки и бебиња беа трансформирани од почетните лесни конструкции во зимски опремени и загреани монтажни градби или беа преселени во цврсти градби. Исто така, им се дели зимска облека и други основни производи за жените и децата, користејќи мобилни тимови во некои места, сооштуваат од УНИЦЕФ.