Фудбалската федерација на Македонија (ФФМ) ќе добие нов претседател на 17 март во Охрид. Управниот одбор, конечно, закажа собир на делегатите за Генерално Собрание што ќе биде и редовно годишно, но и изборно за наследник на Илчо Ѓорѓиоски кој минатото лето поднесе оставка и функцијата што од тогаш како в.д. ја презеде Мухамед Сејдини.
Во меѓувреме се очекуваат Собранија и во Општинските фудбалски сојузи кои треба да истакнат свои фаворити за претседател. Рокот за нивно одржување и изјаснување кому ќе дадат поддршка или зад кого ќе застанат е 22 февруари.
Зад ФФМ е еден поништен термин за Собрание за избор на претседател што беше закажано за 1 септември во минатата година. Во трката се пријавија Влатко Костов, Вујадин Станојковиќ, Сашко Тасев и Харалампие Хаџиристески. Но, комисијата за верификација ги одби Костов, Станојковиќ и Хаџиристески и го прифати само Тасев кој подоцна и самиот се повлече од намерата.