Синдикатот на работниците од управата, правосудните органи (УПОЗ) соопшти дека судската администрација која девет дена е во штрајк се соочува со притисоци. Оттаму тврдат дека претседателот на Судскиот буџетски совет на претседателите на судовите им беше наложено, веднаш да достават списоци за тоа кои вработени штрајкуваат.
Од УПОЗ најавуваат дека и покрај притисоците штрајкот продолжува, а во среда членовите од Синдикатот од судовите во Скопје ќе протестираат пред Министерствето за правда. Тие заедно со Здружението за судска администрација бараат решение од власта за исполнување на барањето за добивање и исплата на додатоци на плата во висина од 35% за судската администрација.
„За Синдикатот ова е обид да се направи поделба на вработените и да се заплашат дека доколку и натаму продолжат со штрајкот ќе добијат само 60% од платата. Но ваквиот притисок уште повеќе ги тера да истраат во борбата за остварување на главните барања од штрајкот, зголемување на додатоците на плата и измена на Законот за судска служба.
Синдикатот на УПОЗ е изненаден од ваквиот нов однос на Судскиот буџетски совет кој веројатно уште еднаш сака да бидат казнети судските службеници – првпат беа казнети кога надлежните не предвидоа зголемување на додатоците на плата и сега со евентуално намалување на нивата плата. Изгледа дека надлежните не знаат дека 70% од вработените во судовите земаат плата под просекот во Р. Македонија. Затоа, доколку надлежните од судската власт решат да ја спроведат ваквата одлука, ќе ги доведат вработените во судовите во уште потешка социјална и економска состојба.
Судската власт мора да разбере дека штрајкот кој е во тек е резултат на нивниот нееднаков третман на судската служба и на игнорантскиот однос спрема Синдикатот и вработените во судовите. Вината за организирање на штрајкот е кај нив и доколку вработените во судовите бидат казнети со задршка на 40% од нивните плати, само ќе докажат дека Министерството за правда и Судскиот совет се џелати на сопствените вработени.
Ова дотолку повеќе што Синдикатот на УПОЗ и Здружението на судска администрација уште минатата недела доставија Предлог – спогодба по која доколку прифатеа да преговараат и ја потпишеа, штрајкот можеше да заврши веднаш.
Нека ваквите притисоци им служат на честа и совеста на надлежните, кои уште еднаш потврдија дека не знаат дека во судовите покрај судиите работат стручни и компетентни судски службеници. “ се вели во соопштението на УПОЗ.