Управниот суд ја уважи тужбата на коалицијата предводена од ВМРО-ДПМНЕ и ја отфрли одлуката на Државната изборна комисија, која го прифати како основан приговорот на БЕСА.
Станува збор за постапката за гласање на гласачкото место 0396/1 во Гостивар.
ВМРО ДПМНЕ донесеното решение од страна на Државната изборна комисија го оспори како незаконито, поради повреди на одредбите на Изборниот законик и погрешно и нецелосно утврдена фактичка состојба и погрешна примена на материјалното право.
„Судот од извршениот увид утврди дека приговорот не содржи потпис од подносителот на приговорот, односно на овластениот претставник Блерим Сејди ниту електронско сандаче за прием на писмената што е спротивно на член 147 став 3 од Изборниот законик, поради што Државната Изборна Комисија погрешно го применила материјалното право, постапувајќи по приговорот, без потпис“, пишува во одлуката на Управниот суд објавена попладнево.
Управниот суд тужбата на ВМРО-ДПМНЕ ја усвоил едногласно со 5 гласа „за“.
Претходно судот соопшти дека ќе уважи тужбата на СДСМ и во недела ќе се прегласува на едно избирачко место во Теарце.