Околу 17.000 војници и полицајци се распоредени во мексиканскиот туристички град Акапулко, каде што се случува голем грабеж откако регионот беше погоден од силен ураган, пренесува Би-Би-Си.
Видеата прикажуваат како луѓето земаат храна и вода од продавниците, додека некои си заминуваат со скапи електронски предмети и облека од трговските центри.
Официјални податоци говорат дека 39 лица загинале, а стотици илјади луѓе останале без струја и вода.
Отис во среда се појави на брегот на Пацификот, со ветрови кои достигнаа брзина од 266 км/ч. Тој се засили од тропска бура во ураган од петта категорија – најтешка категорија – за само 12 часа.
Акапулко беше меѓу најтешко погодените области во Мексико, со оштетени 80% од хотелите во одморалиштето и поплавени улици.
Бројот на загинати во сабота се искачи на 39 – 29 мажи и 10 жени, соопшти владата, додека најмалку 10 се водат како исчезнати.
На социјалните мрежи беа поставени видеа на кои се гледа грабеж во тешко погодените населби, бидејќи резервите на храна и вода сè повеќе се намалуваат.
Главниот пат што го поврзува Акапулко со остатокот од земјата дури сега е повторно отворен, овозможувајќи испорака на основните добра до градот.
Во населбата Ренацимиенто, жителите се лути поради недостигот на помош.
Владата не ни даде никаква помош, дури ни надеж“, изјави Аполонио Малдонадо за новинската агенција Ројтерс, кревајќи ги нозете од водата за да покаже длабоко црвени исеченици на потколениците. Не оставиле храна, па дури ни душеци или креветчиња.
Претседателот Андрес Мануел Лопез Обрадор вети дека ќе помогне во обновата на градот, но ги обвини политичките ривали дека го преувеличуваат обемот на грабежот за да ја дискредитираат неговата влада пред претседателските избори следната година.
Тие кружат како мршојадци, не им е грижа за болката на луѓето, сакаат да не повредат, бидејќи имало многу смртни случаи“, рече тој во видеото објавено на социјалните мрежи.
Официјални лица велат дека Отис била најмоќната бура што некогаш го погодила мексиканскиот брег на Тихиот Океан, чие уништтување се проценува на милијарди долари.
Марта Пешевска
Извор: ЦИВИЛ Медиа