Австралиската полиција на прес конференција извести за успешно спроведената заедничка акција на македонската и австралиската полиција, во која беше уапсен македонско-австралиски државјанин, во врска со недозволена трговија со наркотици.

Акцијата е спроведена од страна на Секторот при МВР за криминалистички истраги и за недозволена трговија со дрога, секторите за прикриени полициски операции и меѓународна полициска соработка, САЕ – Тигар, обвинителството, и со соработка и размена на докази со Австралиската федерална полиција и американската ДЕА.

По едногодишна истрага, во Струга, беше лишен од слобода 27 – годишен маж од Струга, со македонско и австралиско државјанство, кој бил координатор на меѓународна организирана криминална група за договарање на зделките со дрога.

„Се претпоставува дека осомничениот водел организирана и софистицирана нарко банда која била одговорна за увезување на големи количини дрога во Австралија“, потенцираше директорот на единицата за организиран криминал на Западна Австралија, главен инспектор Џон Хачинсон на прес – конференција посветена на апсењето на осомничениот во Македонија.

Во текот на оваа меѓународна операција, во Австралија се лишени од слобода 13 лица, кои биле припадници на криминални групи поврзани со групата која ја координирал стружанецот, при што била запленета дрога во вредност од над 10.000.000 австралиски долари, како и голем износ на парични средства.

Полицијата вели дека осомничениот не стапнал во Австралија за време на операцијата туку криминалот го извршувал од Северна Македонија и други места во Европа.

Против приведеното лице е поднесена кривична пријава и му е одреден притвор од 30 дена.