Ниту еден од деветте уставни судии не застана зад иницијативата за поведување амнестија за „крвавиот четврток“ во парламентот на поранешниот министер за внатрешни работи, Митко Чавков. Тој моментно се наоѓа во затворот во Штип каде издржува казна од 18 години за терористичко загрозување на уставниот поредок и безбедноста при нападот во Собранието на 27 април во 2017 година. Со иницијативата тој сакал да ја оспори амнестијата на дел од обвинетите која не важеше за него.
Уште на почеток судијата-известител Владимир Стојановски кажа дека не може Уставниот суд да му кажува на Собранието, кое е надлежно да донесе закон за амнестија дали да амнестира.
„Уставниот суд не може да се стави на местото на Собранието на Македонија. Собранието има право за кој може, а за кој не може да има амнестија. Уставното овластување на Собранието е негово право да го определи видот и степенот на кој се однесува амнестијата“, рече уставниот судија, Владимир Стојановски по однос на претставката Чавков кој ги спори членовите 1 и 2 од Законот за амнестија и со поднесокот смета дека се повредени член 8 и член 9 од Уставот на Македонија.
Судијата Осман Кадриу, пак, рече дека подносителот е лишен од едно уставно право, односно, е лишен од слобода.
„Дали во овој случај законот содржи дискриминација? – Подносителот тврди дека не бил еднаков третманот на посочениот настан кој е познат како „крвавиот четврток“. Амнестијата е акт на милост. Токму амнестијата е во надлежност само на Парламентот, а другите правни норми како помилување и аболиција се во надлежност на шефот на државата. Амнестијата се дава со закон кој го донесува Парламентот и не се дава на лица со име и презиме, туку групно и за конкретни кривични дела“, рече Кадриу.
Од 33. обвинети за „крвавиот четврток“, 15-тина беа амнестирани, меѓу нив и пратениците Крсто Мукоски и Сашо Василевски, кои ги отворија вратите на Собранието за да влезат насилниците. Амнестијата опфати и други обвинети или осудени лица во помали судски предмети околу настаните на 27 април. За „крвавиот четврток“ беа изречени вкупно 211 години затвор.