Ќе куртулат ли дивите плажи и објекти долж Охридското Езеро ова лето? – Уставниот суд на денешната седница донесе времена мерка за запирање на неодамна отпочнатите активности. Притоа е поведена и постапка за оценување на уставноста на Уредбата на владата со законска сила за примена на Законот за градежно земјиште за време на вонредна состојба и тоа само во делот на дополнувањето што се однесува на плажите под закуп во Охрид и во Струга, изгласано на седница на 9 јуни. Таа ќе се решава по одморите, најрано во септември што значи дека оние закупувачи на простор, иако со истечени договори, веројатно ќе може да ја истуркаат и оваа летна сезона и покрај заложбите на Општина Охрид и градоначалникот Константин Георгиески дека теренските активности нема да запрат за локациите со истечени договори.
„Овој вид на Уредба нема врска со вонредна состојба. Тоа Владата може да си го спроведе со закон, а не со уредба со законска сила за време на вонредна состојба. Вакви уредби се дозволени само за оправдани цели, за нешто што има врска со сузбивањето и со борбата со коронавирусот, поради кој е прогласена вонредната состојба. Што има врска со Kовид-19 обврската на закупецот на плажа на кого му истекол договорот за закуп? – Уредбата треба да има врска со Kовид-19, а не со градежно земјиште“, велат за sdk.mk од Уставниот суд.
Забраната за отстранување на плажите и објектите што се сметаат за дивоградби ќе биде на сила до конечната одлука по поведената постапка. Владината одлука што Уставен ја замрзнува значеше закупецот да го врати земјиштето во првобитна состојба по истек или предвремен раскин на договорот за закуп, со што се забранува вршење на натамошна дејност.
За расчистување на просторот беа задолжени Државниот Пазарен Инспекторат и Управата за Јавни Приходи.