Времена забрана за ограничување на движењето на лицата до 18 години и за оние над 67 години што произлегуваат владините мерки за полициски час и за спречување на ширењето на коронавирусот во земјата.
Ова го изрече Уставниот суд на денешната седница со што се „замрзнува“ Уредбата на Владата за двете категории на граѓани кои ќе може да се движат како и останатите од 5 часот наутро до 19 попладне. За лицата до 18 години досега беше дозволено движење од 12 до 19 часот, а за лицата над 67 години од 5 до 12 часот.
Образложението од Уставниот суд е дека мнозинството на судии сметаа оти мерката е дискриминаторска за двете категории на граѓани. Покрај времената забрана за ограничување на движењето за овие две категории, е одлучено да се поведе и постапка за мерката за чија уставност ќе се гласа на некоја од наредните седници.