Уставниот суд не поведе постапка за оценка на уставноста и законитоста на Законот за амнестија во целина, додека иницијативата за оценка на членот 2 од истиот закон е отфрлена, бидејќи веќе е одлучувано по тоа, информираат од Уставниот суд. Иницијативите за оценување на уставноста и законитоста на Законот за амнестија во целина, поднесена од Тодор Петров од Светскиот македонски конгрес и иницијативата за членот 2 од истиот закон поднесена од адвокат Јошевска Анастасовска, Уставниот суд ги разгледа како прва точка на денешната седница при што ставовите на уставните судии беа поделени.
Уставниот судија Насер Ајдари, образложувајќи ги иницијативите, рече дека барањата за утврдување на уставност треба да се отфрлат како неосновани бидејќи судот веќе се има произнесено по овој закон.
„Според Деловникот, кога Уставниот суд на претходна иницијатива ќе се произнесе по вакво прашање, единствено решение е ваквиот предлог да се отфрли како неоснован. Уставниот суд не може да се става во улога на Собранието, туку тој одлучува дали Собранието имало уставно право да го донесе законот и затоа ваквите прашање за правото на давање аменстија се неосновани“, рече Ајдари.
Според судијата Јован Јосифовски, овие две иницијативи се детално образложени и треба да се прифатат, особено што тој останува на својот претходен став, дека законот е противуставен.
„Неспорно е дека Собранието дава амнестија, туку членот 2 со кој се префрла правото на одлучување на судот. Ова не е прв пат да се дава амнестија, туку шести случај. Не може Собранието, кое дава амнестија да го пренесе правото на судот да одлучува арбитрарно кој ќе добие, а кој нема амнестија за ист кривичен настан. Од тие причини сметам дека законот е противуставен“, рече Јосифовски.
Претседателот на Уставниот суд, Сали Мурати, истакна негов личен став и вели дека сите правни норми мора да бидат функционални и дека со давањето вакви закони за вакви настани не се зацврстуваат државните вредности.
„Никогаш нема да поддржам вакви амнестии кои одат на штета на државата. Се овој закон во целост ние нема да ги дисциплинираме сторителите и не ги зацврстуваме државните вредности“, изјави Мурати.
Судијата Осман Кадриу, нагласи дека треба да се прифати дека законодавецот не дава амнестија за дела со кои се загрозува интегритетот и суверенитетот на државата. Уставната судијка Елена Гошева, пак, рече дека има многу недоследности и дека треба да се отфрли предлогот за одбивање на иницијативата како неоснована.
„Дали Собранието на претходните амнестии одлучуваше што ќе опфаќа и кои кривични дела. Кога се донесе амнестијата од 2001 година не се гледаше за какви и колку дела се амнестираат. Не сакам да се враќам назад на вака болни теми, но не може сега да тврдиме дека законот е уставен, изјави Гошева.
Меѓу амнестираните за настаните од 27 април во 2017 година беа петмината пратеници Крсто Мукоски, Сашо Василески, Јохан Трчуловски, Љупчо Димовски и Љубен Арнаудов кои беа обвинети дека ги отвориле вратите и ги насочувале тие со фантомки и другите граѓани кон пленарната сала и кон прес-центарот во Собранието. Богдан Илиевски, Владо Јовановски и Борис Дамовски кои беа водачи на протестите на “За заедничка Македонија“ и кои беа обвинети дека со потпалувачки говори ги повикале граѓаните да влезат во Собранието исто така беа амнестирани.