Уставниот суд на Република Македонија денеска ќе ја одржи последната седница пред летните одмори. На дневен ред нема иницијативи, туку само текстови на нацрт-решенија што ги донел судот, а уставните судии продолжуваат со работа во септември.
Ова значи дека приврзаниците на Шарената револуција и опозицијата, чие приоритетно барање е Судот да се произнесе за уставноста на Специјалното јавно обвинителство (СЈО), за што следуваа низа протести и герила акции, за одлуката на Уставен ќе треба да почекаат до септември, а можеби и подолго, со оглед на тоа што Судот одбива да соопшти кога Иницијативата за СЈО би се нашла на дневен ред.
Од Шарената револуција за летниот период најавија различни форми на притисок, а пратеничката група на СДСМ се уште е со замрзнати активности во Собранието. Засега ниту демонстрантите ниту опозицијата ги немаат прецизирано понатамошните чекори.
Од Уставниот суд иако не веруваат, не ја исклучуваат можноста од вонредна седница во текот на август.
-Таков случај немало во 50 години постоење на Уставниот суд, но ништо не можам да кажам со сигурност. Судот ги определува предметите како што сака и како што смета дека треба и досега никој не се мешал во неговата работа. Никогаш немало вакви притисоци како сега, ќе дојде ред на сите Иницијативи да се разгледаат, вели за НОВА портпаролката на Судот Оливера Филиповска.
Иницијативата со која се оспорува Специјалното обвинителство ја поднесоа претседателот на Светскиот македонски конгрес Тодор Петров и Томе Тодоровски , адвокат од Свети Николе.
За нив е спорно што со донесувањето на Законот, постојаното Јавно обвинителство не е веќе ,,единствен и самостоен државен орган кој ги гони сторителите на кривични дела, туку со закон е воведен специјален јавен обвинител кој работи врз основа на овластувања што ги нема во Уставот.
Тоа според нив создава ситуација за одреден сегмент на кривични дела да бидат оневозможени и блокирани надлежноста, работата и функционирањето на Јавното Обвинителство.
Се оспорува и делот кој се однесува на организацијата и начинот на функционирањето на специјалниот јавен обвинител како и траењето на мандатот од 4 години.
Од СЈО досега повеќепати се изјаснија дека Законот не е спорен и дека како Јавно обвинителство за гонење на кривични дела поврзани и кои произлегуваат од содржината на незаконското следење на комуникациите постапува согласно Законот за Јавно обвинителство за гонење на кривични дела поврзани и кои произлегуваат од содржината на незаконското следење на комуникациите и дека тоа е во согласност со Уставот и меѓународните договори ратификувани во согласност со Уставот и законите во Република Македонија.
Одговор од септември па натаму ќе може да очекува и струшкиот градоначалник Зијадин Села, кој бараше да се преиспита одлуката за поставување 55. метарски крст во општина Бутел – за која Села тврди дека не е во согласност со Бадинтеровиот принцип.