Иницијативите на Министерството за животна средина и просторно планирање (МЖСПП) за прогласување на Шар Планина за Национален парк и Осоговските планини за заштитено подрачје од категорија V беа усвоени на вчерашната седница на Владата. Ова го истакна првиот човек на МЖСПП, Насер Нуредини на денешната прес-конференција на која говореше за бенефитите на државата од заштитата на двете подрачја,за локалните самоуправи и население кои гравитираат во нивни рамки, но и за активностите што ќе следат.
„Со финализација на овој процес, ќе се зголемат можностите за прекугранична соработка со соседните земји, особено од аспект на фактот дека Шар Планина ќе стане еден од најголемите национални паркови во Европа, а истовремено заштитата на овие подрачја значи напредок и исполнување на обврските кон ЕУ директивите. Соодветното управување со заштитените подрачја значи користење на огромниот потенцијал за развој на локалната економија. Тоа подразбира заштита, зачувување и одржливо користење на природните вредности, заживување на селата во и околу заштитеното подрачје со развој на еко-туризмот, традиционалното земјоделие и овчарството“, наведе Нуредини.
Статусот за заштита, како што информира тој, бил утврден од страна на експертски тим кој спровел студии за валоризација на подрачјата со кои било утврдено дека содржат високо ниво на биолошки и културни вредности за чие зачувување треба да бидат преземени мерки.
Нуредини, согласно законската процедура за прогласување на заштитените подрачја, нагласи дека ќе има јавни дебати што базирани од предлозите на локалното население. По усогласувањето на мислењата и забелешките ќе бидат изготвени конечните предлози за прогласување на овие локации кои повторно ќе бидат доставени до Владата за усвојување. Министерот за животна средина и просторно планирање притоа увери дека ќе бидат земени во предвид сите барања од засеганатите страни за обезбедување на заштита на природата без нанесување на штети на локалното население и обезбедување на развој на локалитетите според европските стандарди.