Скопје по четврти пат ќе се приклучи на интернационалниот Winter Bike to Work Day кој веќе шеста година се одржува во светски рамки. Иницијативата е меѓународна и е од отворен тип.
Целта на оваа иницијатива е подигање на свеста за важноста и придобивките од користењето на велосипедот како превозно средство.
Спортскиот Центар „Борис Трајковски“ како промотор на правилен и здрав начин на живот повикува на поддршка на процесот за развој на урбаниот велосипедизам во Скопје со приклучување кон интернационалниот Winter Bike to Work Day кој е закажан за петок 09.02.2018 година.
За учество, потребна е само регистрација на сајтот https://winterbiketoworkday.org/ и тој ден да се движите синхронизирано заедно со многу луѓе низ целиот свет до вашата секојдневна дестинација.
Од иницијатаивата #НаТочак велат дека “ Нема лошо време, туку само лоша опрема. Менувањето на личните навики и пробивањето на комфорната зона е процес кој најмногу се менува преку личен пример“.
Се апелира до сите кафулињата, баровите, рестораните, продавниците за велосипедска опрема и сите останати деловни субјекти да се вклучат во славењето на овој ден преку овозможување на најразлични поволности, попусти и награди за оние кои ќе дојдат на точак до нивните локали и ќе купат нивен производ/услуга.
Сите јавни институции, министерства, општини, јавни претпријатија, училишта, факултети, но и сите приватни компании кои ќе се придружат на оваа иницијатива, може да направат свој настан, свои промотивни материјали, свои понуди, свои награди за своите посетители /вработени/ ученици кои ќе пристигнат на точак тој ден.
Засега, поддршка на оваа иницијатива дадоа Градот Скопје и Министерството за образование и наука, кое ги повика учениците, студентите, наставниците и професорите да се придружат на иницијативата.
„Уживајте во возењето, почитувајте ги правилата во сообраќајот, внимавајте на сопствената безбедност и безбедноста на останатите граѓани и учесници во сообраќајот. Грижата за животната средина, вашата среќа и благосостојба, заштедата на време и пари, се најголемата мотивација за возењето велосипед“, пишува во повикот од МОН.