Студентите најавија собир пред Ректоратот на Универзитетот „Кирил и Методиј“  утре изутрина, за кога е закажана вонредна седница на Ректорската управа.

Вонредната седница доаѓа по прозивките од страна на студентите дека Универзитетот, мора да ги осуди нелегалните избори за студентски претседател.

Во соопштението испратено од ректорот во заминување Велимир Стојковски се наведува дека во понеделник во 8 часот е закажана вонредна седница, а од Студентскиот парламент се бара итно детално објаснување за сите околности и случувања поврзани со студентските избори.

„ Длабоко сум загрижен од информациите кои беа објавени во медиумите за случувањата со студентските избори, кои беа под секое достоинство, како и употреба на полициски сили со оклопни возила во академски студентски избори. Поради тоа, упатувам апел до сите студенти, членови на СПУКМ, членови на Студентскиот пленум, членови на студентски иницијативи и други форми на организирање на студентите, за воздржаност од било какви активности кои дополнително би ја усложниле ситуацијата, што би можело да доведе до сериозни последици од повеќе аспекти“, вели Стојковски во соопштението испратено до јавноста.

Притоа се нагласува дека Универзитетскиот сенат на конститутивна седница одржана на 27 јуни формирал комисија за измена на Статутот на УКИМ во делот кој се однесува на студентското организирање.

Студентите велат дека очекуваат сите професори, членови на универзитетскиот Сенат едногласно да ги осудат изборите и да побараат одговорност од Студентскиот парламент.

Изборите за студентски лидер кои се случија вна 30. јуни се најконтроверзните досега.

Студентскиот Пленум во повеќе наврати алармираше дека Студентскиот Парламент спроведува нелегитимни избори, во сезона кога повеќето студенти се на студенската програма за патување и работа во странство или се вратени во своите градови надвор од Скопје.

На денот на изборите, ситуацијата кулминираше со пренесување на гласачки кутии од УКИМ до Студентскиот Парламент со трчање на организаторите и со обвинувања и бојкот од страна на Пленумците, кои до доцна ноќта бараа поништување на изборите пред Парламентот, а по нивните пријави за фалсификат, а за возврат МВР пред студентите ја извади единицата за брзо распоредување (ЕБР).

Сепак, и покрај реакциите, Студентскиот Парламент одлучи да спроведе избори, за кои писмено соопшти дека за нов лидер е избран Давор Поповски, кој освоил 3.851 гласови.

Студенти: Полицијата не тепаше, а ние стоевме со кренати раце