Published: Monday, July 20, 2020 13:53
Британските медиуми објавуваат вести за нов третман во борбата против Ковид-19 кој, според резултати од првото клиничко тестирање, драматично го намалува бројот на пациенти на кои им е потребна интензивна нега. Третманот е развиен од англиската биотехнолошка компанија „Синегџен“ и користи протеин наречен интерферон бета, што телото го произведува кога се бори со вирусни инфекции.
Протеинот се инхалира директно во белите дробови на пациентот со Ковид-19, со надеж дека ќе предизвика имунолошка реакција. Првичните откритија покажуваат дека третманот за 79 отсто ги намалува шансите за хоспитализираниот пациент да развие сериозна форма на болеста.
„На овој начин, постојат два до три пати повеќе шанси дека пациентот ќе заздрави. Исто така, третманот значително го спречува губењето здив кај пациентите, а престојот во болница се намалува од просечни девет дена на шест“, велат од „Синерџен“.
Резултатите од тестирањето досега не се објавени во целост, ниту тоа има добиено рецензија во медицинско списание.