Мексиканската лабораторија за допинг контрола ќе биде под суспензија во наредните шест месеци. Ваква одлука донесе Светската анти-допинг агенција (ВАДА) што ја образложи со непочитување на новите правила за квалитет во работата. Со неа, се вели во соопштението, се забрануваат „секакви активности во доменот на контрола на допингот вклучувајќи и анализа на примероци на крв и на урина“.
За време на суспензијата, сите примероци ќе мора да бидат префрлени во друга лабораторија што е акредитирана од ВАДА со цел за „зачувување на довербата на спортистите во квалитивната анализа и целокупниот систем на анти-допинг контрола“. Во периодот додека мексиканската лабораторија е „под мраз“ се наложува и отстранување на сите неправилности што се утврдени во програмата „Систем на екстерна проверка на квалитетот“. Истото се однесува и на недостатоците што ги воочи ВАДА.
Лабораторијата во Мексико има рок од 21 ден за обжалување на одлуката пред Судот за спортска арбитража во Лозана. Светската анти-допинг агенција на 15 ноември ја суспендира и лабораторијата во Доха.