– Ме радува тоа што меѓу Скопје и Атина се разви еден култивиран и конструктивен дијалог и се надевам дека сето тоа ќе води кон резултат и дека нема улицата и демонстрациите во тоа да играат пресудна улога. За чекори кои водат напред потребни се храбри и одговорни политичари и оние кои нема да се уплашат од демонстрациите пред нивните канцеларии, вели известувачот за Македонија во Европскиот парламент, словенечкиот европратеник Иво Вајгл.
Во интервју за МРТ, Вајгл, кој заедно со уште двајцата европратеници Кнут Флекенштајн и в понеделник доаѓаат во Македонија, вели дека сега постои оптимизам за можниот напредок на Македонија во евро-атлантските интеграции.
– Јас сум голем оптимист. Верувам дека проблемот со Грција нема да биде онаа бариера преку која Македонија нема да може да помине. И на пленарната дебата јас истакнав дека земјите кои се членки на ЕУ не смеат да бидат пречка, да вршат притисок или да ги уценуваат државите кандидати. Тука се разбира мислев и на македонските соседи и мислам дека тоа беше и така сфатено, истакнува европратеникот.
Тој смета дека цела Европска унија конечно го сфатила значењето на земјите од Западен Балкан, а доказ за тоа е неодамна претставената Стратегија за проширување на ЕУ кон оваа група земји.
– Мислам, дека стратегијата на Европската комисија е многу сериозен и стратегиски ориентиран документ, тоа не е обичен годишен извештај, тоа е стратегија за идните десет години. Мислам дека тоа зборува дека целата ЕУ, цела Европа го сфати значењето на Западен Балкан, а во срцето на Западен Балкан се наоѓа и Македонија. вели Вајгл за МРТ.
Вајгл, Флекенштајн и Кукан в понеделник во Скопје ќе учествуваат на 13. Конференција на Парламентарните комисии за европски прашања/интеграции на државите опфатени во процесот за стабилизација и асоцијација од ЈИЕ – Косап.
Засега нема информации дали тројцата пратеници ќе имаат официјални средби со претставници на парламентарните партии. Од канцеларијата на Вајгл во ЕП информираат дека во неговата агенда е само Косап.
Европратениците беа иницијатори на идејата за разговори во куќата на Жан Моне во Париз, но средбата на претставници на парламентарните групи беше одложен.
Првиот предвиден термин, минатиот месец, пропадна бидејќи, како што изјави Вајгл, не добија потврда од ВМРО-ДПМНЕ, која беше во процедура на избор на ново раководство.
– Не е можно да се замисли работата на Парламентот да биде ефикасна и прифатена од ЕУ и од нејзините држави, ако опозицијата ја бојкотира работата. Секогаш ја истакнувам одговорноста на владејачката коалиција дека треба да и даде признание и чувство на конструктивен партнер на опозицијата, особено ако е толку многу силна, како што е силна во Македонија. Според ова одговорноста за конструктивната работа во Парламентот ја имаат двете страни, вели Кикан во интервјуто за МРТ пред доаѓањето во Скопје.