Претседателот на Врховниот суд на РМ Јово Вангеловски денеска за МИА изјави дека очекува во текот на денов да биде објавена одлуката по жалбите за притворите на пратениците и другите осомничени за настаните во Собранието од 27 април минатата година.
– Одлуката ќе биде објавена веднаш штом се донесе, потврди Вангеловски. Прашан кога ќе се случи тоа, рече оти се надева да биде денеска.
Рокот од 48 часа за донесување на решението по однос на жалбите на притворените истече во четвртокот.
– Судот не доцни со решение, туку се работи за сложен предмет за кој не може да очекувате да има брза одлука. Предметот е во Судот помалку време отколку што беше во Обвинителството. Одлука најверојатно ќе има утре, изјави претседателот на Врховен Јово Вангеловски за Телевизија 24.
По жалбите кои се поднесени на решенијата на Апелацискиот суд и со нив се бара укинување на мерките притвор и куќен притвор и изрекување на поблаги казни за обвинетите, Врховен одржа јавна седница минатата недела.
Според адвокатите на обвинетите, решенијата на Апелацискиот суд се паушални и недоволно образложени и нема основи за влијание врз сведоци со оглед на фактот дека истрагата за овие настани е завршена. Пред петчлениот судски совет на Врховниот суд беше посочено од страна на бранителите дека нема основи и за бегство на обвинетите и оти тие се заинтересирани да се открие фактичката состојба за настаните од 27 април.
Меѓу другите обвинети, за поранешниот министер за внатрешни работи Митко Чавков и пратениците Крсто Муковски и Сашо Василевски се бара укинување на мерката притвор, а за пратеникот Љупчо Димовски и оперскиот пејач Игор Дуловски укинување на мерката куќен притвор и изрекување на мерки на претпазливост.
Адвокатот на Чавков пред петчлениот совет на Врховниот суд побара укинување на притворот за неговиот клиент притоа посочувајќи дека во затворски услови тој не може да ја има соодветната нега по преживеаниот инфаркт. Посочи и дека основите на сомнение за кои се товари неговиот клиент оти не издал наредба за дополнителни сили на терен не се доволни за изрекување на мерката притвор.
На јавната седница не беше присутен обвинетиот Оливер Поповски, но неговиот застапник, по реакцијата зошто тој не е спроведен, се согласи да се одржи јавната седница без присуство на Поповски.
Муковски, Василевски, Чавков, Димовски, Дуловски, Поповски и полицискиот службеник Мунир Пепиќ се дел од 35-те осомничени за терористичко загрозување на уставниот поредок и безбедноста.