За да го сочува својот кредибилитет, Европската унија (ЕУ) мора да ја забрза евроинтеграцијата на земјите од Западен Балкан и тој процес да биде многу подинамичен, истакна еврокомесарот за проширување, Оливер Вархеји на пленарното заседание на Европскиот парламент во Стразбур.
Вархеји нагласи дека ЕУ мора да ги отвори пристапните преговори со Северна Македонија и Албанија бидејќи двете земји ги исполнија условите што им беа поставени. Проширувањето кон Западниот Балкан, според него, може да биде успешно само ако ЕУ ги исполни ветувањата што ги дала, а за тоа е неопходен побрз и подинамичен процес.
„За време на долгите подготовки и преговарачки процес, ќе ни биде неопходна многу посилна политичка контрола со максимално учество на земјите членки. Во спротивно ризикуваме јакнење на силите кои би можеле да нанесат штета на преговарачкиот процес“, предупреди Вархеји.