Шефот на кабинетот на полскиот претседател, Збигњев Богуцки, изјави дека Украина не ја искористила можноста што ѝ ја дал полскиот претседател Карол Навроцки да ја поништи одлуката за именување воена единица по хероите на Украинската востаничка армија (УПА).
Изјавата следува откако Полска му го одзеде на украинскиот претседател Володимир Зеленски Орденот на Белиот орел поради оваа одлука.
Коментирајќи ја реакцијата на украинскиот министер за надворешни работи Андриј Сибиха, кој потегот го нарече „стратешка грешка што ѝ користи само на Москва“, Богуцки рече дека Полска не направила никаква грешка.
„Нема грешка од страна на претседателот Карол Навроцки. Грешката ја направи украинската страна кога претседателот Зеленски одлучи важна украинска единица да ја именува по злосторниците од УПА“, изјави Богуцки.
Тој додаде дека одлуката на Зеленски била донесена спротивно на претходно постигнатите договори и дека Полска ѝ дала време на Украина да ја преиспита и повлече одлуката.
„Украина не ја искористи таа можност, па претседателот ја донесе својата одлука внимателно и промислено“, рече Богуцки.
Полскиот претседател Навроцки вчера одлучи да му го одземе Орденот на Белиот орел на Зеленски поради именувањето на украинска воена единица по Украинската востаничка армија.
Навроцки порача дека Полска нема да дозволи влез во Европската Унија на оние кои не ја разбираат потребата од откажување од „култот на тоталитаризмот и насилството“.
Полскиот премиер Доналд Туск изрази жалење поради продлабочувањето на спорот меѓу Полска и Украина, оценувајќи дека тоа „го радува Путин и ги шокира сојузниците“.
Украинските власти, вклучително и Сибиха, најавија дека ќе ги вратат полските државни одликувања што претходно им биле доделени.
Украинската востаничка армија (УПА) беше националистичка паравоена организација која се бореше за украинска независност за време и по Втората светска војна. Полска ја смета УПА за одговорна за масовните убиства на Полјаци за време на Волинската трагедија во 1943 година, додека во Украина дел од јавноста ја гледа како симбол на борбата за независност.