„Вашето време истече, време е за СЈО“ е пораката која Шарената револуција при денешниот собир за поддршка на специјалната обвинителка Катица Јанева ја испрати до пратениците пред Законодавниот дом.
По неколку месеци пауза “шарените“ денеска се вратија на улица да им дадат до знаење на пратениците, пред се од владјечкото мнозинство дека Јанева не е сама и ја ужива поддршката на граѓаните кои се критични кон власта.
Собирот се одвиваше мирно, без никаков инцидент и под полициско обезбедување, а присуство на полицијата можеше да се забележи и пред старите “станици“ на Шарената револуција, односно седиштето на ВМРО-ДПМНЕ, Министерството за правда како и пред Народната канцеларија на претседателот Ѓорѓе Иванов.
Пораката испратена пак од денешните говорници, адвокатот Звонко Давидовиќ и активистот Александар Младеновски е јасна и единствена – СЈО треба да биде заштитено, граѓаните да останат сплотени во соочувањето со криминалот.
– Тука сме за да ги потсетиме пратениците дека тие ја изгласаа Катица Јанева и дека треба да го почитуваат СЈО и дека треба да ги донесат законските измени за законот за заштита на сведоци кои што таа ги бара. Пратениците прво да си ги преиспитаат членовите на Судскиот совет за нивните капацитети, рече Давидовиќ осврнувајќи се на нападите врз Јанева на адреса на нејзината компетенција до страна на пратениците од власта.
Младеновски пак, нотираше дека во овие времиња, македонскиот народ е сведок на масовните исселувања на младите од земјата.
– Не делат по сите основи, на Македонци и Албанци, на патриоти и комуњари и тоа е срамно, а истовремено, сме сведоци на масивниот егзодус на младите. Да не дозволиме да го укинат СЈО кое е единствената некорумпирана институција, рече тој.
Присутни на собирот беа граѓани од различна возраст, со различни политички гледишта и од различна етничка припадност, но сите скандираа „Катица, Катица“ во знак на поддршка за јавната обвинителка која има специфична задача, заедно со нејзиниот тим да ги истражи индициите за криминал на власт, а кои произлегоа од “бомбите“ на лидерот на СДСМ, Зоран Заев.
Во интервјуто со еден од истакнатите активисти на Шарената револуција, Демијан Хаџи-Ангеловски, тој вели, поддршката е многу значајна за Јанева и нејзиониот тим во овие моменти кога се соочува, како што вели тој, со недолични коментари од страна на пратениците од владејачкото мнозинство.
Имено Катица Јанева, по неколку денови одговарање пред пратениците, денеска ја напушти Комисијата за политички систем и односи меѓу заедниците, реагирајќи дека врз неа се врши класичен мобинг иако таа е првата која по години наназад доставила извештај за својата работа и која дошла истиот да го образложи.
Освен тензичните расправи кои се водеа во Комисијата, на тимот на Јанева се уште им претстои одлуката на Уставниот суд, кој треба да се произнесе за законитоста на СЈО, како што е договорено според целокупниот Пржински договор.