Вечерва (21 ч.) почнува да важи мерката „полициски час“ за територијата на цел град Скопје со околните општини, за Куманово, за Липково, за Штип, за Карбинци, за Тетово, за Боговиње, за Брвеница, за Теарце, за Желино и за Јегуновце и забраната за движење во овие места ќе трае до понеделник во 5 часот наутро. Ваквата одлука беше донесена на вчерашната владина седница по препораката на Комисијата за заразни болести по зголемениот број на новодијагностицирани случаи со ковид-19 во земјава и за ефикасно спречување на ширењето на вирусот.
Во сите останати градови во земјата ќе биде на сила забрана за движење на сите граѓани од 21 часот до до 5 часот наутро, мерка што утре, во сабота и во недела ќе започнува од 16 часот и ќе трае до наредниот ден во 5 часот наутро.
Од вечерва во 21 часот до понеделник во 5 часот се забранува и посета на гробиштата на територијата на цела држава, освен за погреби.
Отстапки од овие забрани се однесуваат за земјоделските активности, поради што е дозволено движење во рамки на територијата (атарот) на селата, исклучиво за работни потреби. Аптеките ќе работат непречено, а Министерството за здравство ќе изработи план за непречена работа и на здравствените установи.
Исклучоците од забраната за движење важат за полицијата, армијата, здравствените работници (во ЈЗУ и ПЗИ, како и матичните лекари) и за маркетите и рестораните кои вршат достава на производи, при што тие своите ангажмани ќе ги реализираат непречено.
Остануваат да важат сите издадени дозволи за движење за време на претходните забрани за движење кои беа воведени, особено за економските оператори и за работа што организирана во смени. Прошетката на милениците ќе биде во веќе востановените термини во периодите 08 – 8:30 часот, 15 – 15.30 часот и 20 – 20:30 часот. Забраната за движење не важи за лицата со попреченост и за нивните придружници доколку имаат соодветна документација.
Министерот за здравство Венко Филипче вели дека групирањата, непочитувањето на мерките и неказнувањето се причина за раст на заболените и враќање на полицискиот час.
„Овој нов бран е директна последица на непочитување на јасно пропишаните мерки, но и задоцнета или слаба активност за казнување од страна на надлежното министерство. Се надевам дека конечно и на последните скептици ќе им стане јасно дека вирусот не е шега. Вирусот нема да замине додека сите не прифатиме дека претставува закана за секој кој не ги почитува мерките за заштита. И после одржани речиси 100 прес-конферении и илјадници пати повторени апели и пораки еден дел од граѓаните се уште одбиваат да ја прифатат реалноста, да прифатат дека одговорноста е на секој поединец“, рече Филипче на синоќешната прес-конференција.
Повторното воведување на рестриктивните мерки следува по зголемениот број новодијагностицирани случаи со ковид-19 во земјава во изминатите денови. Само вчера беа регистрирани 101 случај со ковид-19 од кои најголем дел во Скопје – 59, во Куманово – 12, во Штип – 7, во Струга – шест, во Тетово – 5, во Гостивар и во Кочани – 3, во Пробиштип – 2, во Прилеп, во Велес, во Охрид и во Кавадарци -1.
Институтот за јавно здравје вчера регистрира 10 оздравени пациенти и четворица починати. Вкупниот број на ковид дијагностицирани во земјава од почетокот на епидемијата изнесува 2.492, бројот на оздравени пациенти е 1.605, а на починати 145. Во моментоt во земјава има 742 активни случаи. Досега се направени вкупно 32.161 тестирања на ковид -19.