Ниту сум помислил ниту сум кажал некому да ги отвори вратите во Собранието, одговори Трајко Вељаноски на денешното сведочење во Судот за настаните од 27 април, кога тој претседаваше со седницата.
Вељаноски исто така рече и дека „е присутен како сведок и е под заклетва дека ќе ја зборува само вистината, а обвинетите можат да зборуваат и невистини“.
Обвинетиот Никола Митревски Кољо го праша Вељаноски дали им дал наредба на пратениците да ги отворат вратите и, како што рече „да се направи хаос“.
Кољо праша и дали давал наредби преку вибер комуникација.
Вељановски одговори дека тоа се невистини и дека сите докази се предадени во Обвинителството.
Кољо го праша Вељаноски и дали протестите биле организирани од матичната партија на Вељаноски ВМРО ДПМНЕ, но судијката Кацарска не му дозволи да одговори, и го одби прашањето.
Обвинетиот Никола Митревски понатаму го праша Вељаноски дали „целото сценарио за 27 април е добро смислено за да се искористи народот“, на што Вељаноски одговори дека тој како претседавач само се грижел да започне и да заврши седницата и според Деловникот да биде избран претседател на Собранието.
На прашањето до Вељаноски, дали се согласува дека имало мал број полицајци и не преземале ништо да ја спречат толпата да се каче пред неговиот Кабинет, Вељаноски одговори дека внатрешното и надворешното обезбедување се под надлежност на МВР и тие одлучуваат колку обезбедување треба да има.
Претходно, и обвинетите Јане Ченто и Игор Југ му поставуваа прашања на поранешниот претседател на Собранието.