Пет потпретседатели на Собранието се многу, порачува поранешниот спикер во законодавниот дом, Трајко Вељаноски како реакција на таквиот предлог за денешната парламентарна седница што ја закажа Талат Џафери. Според него, нема никаква економска оправданост и причина за пет потпретседатели на Собранието.
„Демократијата е скапа играчка, но изгледа само во Македонија важи правилото, што поскапо тоа е поголема демократија. Нема економска оправданост и причина за толкав број на потпретседатели на Собранието“, напиша Вељаноски.
Вељаноски, кој беше прв човек на Собранието од 2008 година до 2016 година, потсети дека во времето на владеење на претходната гарнитура имало по тројца потпретседатели, а во постот на својот Фејсбук профил наведе и такви примери од неколку европски држави.
„Во САД има 435 пратеници и еден потпретседател, во Велика Британија има 650 пратеници и тројца потпретседатели, Словенија има 90 пратеници и тројца потпретседатели, Италија има 630 пратеници и четворица потпретседатели, Германија има 709 пратеници и пет потпретседатели“, наведува Вељаноски на Фејсбук.