Велешкото Основно јавно обвинителство поднесе обвинение против 23-годишна велешанка за кривично дело убиство на миг.
Според обвинителството, обвинетата на 29 септември минатата година, во семејната куќа во која живеела, доведена без своја вина во состојба на силна раздразнетост како последица на семејно насилство, го лишила од живот А. Р. со кого живеела во вонбрачна заедница.
„Кога се вратиле дома од гости, А. Р. во видно алкохолизирана состојба почнал вербална расправија со обвинетата нарекувајќи ја со најпогрдни зборови. Таа влегла во спалната соба и легнала да спие, но тој дошол до неа, ја фатил за пижамата и со неа ја влечел до кујната удирајќи ја со тупаници по главата, увото и левото рамо, како и со клоци во левата натколеница. Потоа силно ја фатил со рацете во пределот на вратот да ја дави.
Обвинетата давала отпор и го молела да ја пушти, а во еден момент од масата зела нож и му нанела убодна рана во пределот на срцето. Како последица на убодот, дошло до смрт кај А. Р.“, објаснуваат од Обвинителството.
Со оглед на тоа што постојат околности што укажуваат на опасност од бегство на обвинетата, заедно со обвинението е доставен и предлог за продолжување на куќниот притвор определен за обезбедување на присуството на обвинетата во текот на кривичната постапка.