Обединетото Кралство ја предупреди Полска дека испраќањето борбени авиони во Украина може да ги стави на „директната линија на оган“ од Русија.
Како што јавува Си-Ен-Ен, секретарот за одбрана Бен Валас изјавил за Скај њуз дека иако Обединетото Кралство ќе го „поддржи“ полскиот избор за снабдување на Украина со борбени авиони, земјата треба да биде свесна за предупредувањето на Русија за „одмазда“.
Веста доаѓа еден ден откако американската амбасадорка во НАТО, Џулијан Смит изјави за Си-Ен-Ен дека американските власти разговараат со полската влада за Полска да испрати борбени авиони Миг-29 за поддршка на Украина. Смит нагласи дека ова е „суверена одлука“ на Полска.
„Полска се граничи со повеќе земји, меѓу другите и со Белорусија која е активен учесник со Русија. И Полска треба да знае дека со својот избор може да и помогне на Украина, што е добро, но може и да се најде на директна линија на огнот од Русија или Белорусија“, рече Валас.
Валас додаде дека не е негово да погодува каков избор ќе направи Полска истакнувајќи дека има „навистина голема одговорност на рамениците на претседателот на Полска и министерот за одбрана“.
„Мое како колега и членка на НАТО е да кажам дека ќе ја поддржиме Полска каков избор и да направи“, заклучи Валас.
Досега, НАТО остана цврсто во својата неподготвеност директно да се вклучи во конфликтот, освен поддршката на отпорот на Украина кон инвазијата што убива невини цивили, додека американските власти јасно ставија до знаење дека американските трупи нема директно да се вклучат во борба со руските сили.
И двете страни во петокот се спротивставија на повиците за воспоставување зона на забранети летови во Украина, предупредувајќи дека тоа може да доведе до „целосна војна во Европа“ и велејќи дека прават се што можат за да и помогнат на Украина да се брани од руската инвазија.